पिंपरी - पिंपरी-चिंचवड महापालिकेच्या वतीने निगडी येथे ३० ते ३५ वर्षांपूर्वी बांधलेल्या पीसीएमसी कॉलनीची अत्यंत दुरवस्था झाली आहे. त्यातील अनेक इमारती ढासळण्याच्या स्थितीत आहेत. येथील रहिवाशांचे लवकर पुनर्वसन करावे. तसेच पुरेशा सोयीसुविधा उपलब्ध करून द्याव्यात, अशी मागणी भाजप कार्यकर्ते सचिन काळभोर यांनी केली. 

महापालिका आयुक्त श्रावण हर्डीकर यांनी नुकताच निगडी येथील विकासकामांचा पाहणी दौरा केला. त्या वेळी काळभोर यांनी त्यांना लेखी निवेदन दिले. त्यामध्ये म्हटले आहे, की महापालिका प्रशासनाने १९७७ मध्ये नऊ इमारतींची पीसीएमसी कॉलनी बांधली. एका इमारतीत ६४ अशा एकूण ५७६ सदनिकांची ही कॉलनी आहे. सध्या तेथे दीड ते दोन हजार रहिवासी राहत आहेत. मात्र, कॉलनीची पूर्णपणे वाताहत झाली आहे. इमारतीतील जिनेही मोडकळीस आले आहेत. मैलापाणी वाहिन्या जागोजागी फुटल्याने मैलापाणी रस्त्यावर पसरले आहे. एकाही इमारतीत महावितरणची अधिकृत जोड नाही. या वसाहतीचे पुनर्वसन करावे, अशी मागणी येथील रहिवासी गेल्या १० ते १५ वर्षांपासून करत आहेत. याबाबत लवकर निर्णय घ्यावा.