पुणे : सातारा रस्त्यावर पद्मावती चौकाजवळ बीआरटी मार्ग तयार करताना झालेली चूक महापालिकेने तब्बल दीड वर्षानंतर दुरुस्त करण्यास सोमवारी प्रारंभ केला. 

महापालिकेने बीआरटी मार्गात बस थांबा उभारल्यावर, त्या शेजारून बस जाऊ शकत नाही, असे लक्षात आले. त्या बाबतचे वृत्त 'सकाळ'ने गेल्या वर्षी फेब्रुवारीमध्ये प्रसिद्ध केले होते. त्या नंतर पाठपुरावा ही केला होता. महापालिका आयुक्त सौरभ राव यांनी 3 दिवसांपूर्वी या रस्त्याची पाहणी केली. त्या नंतर काल मध्यरात्री पद्मावती जवळील चौकात बीआरटी मार्ग पाडण्यास सुरवात झाली. मंगळवारी (ता. 4) देखील हे काम सुरू राहणार आहे, असे महापालिकेच्या पथ विभागाने स्पष्ट केले आहे.

सातारा रस्त्यावर डिसेंबर 20016 मध्ये बीआरटी मार्गाच्या फेररचनेस प्रारंभ झाला. 2 वर्षांत हे काम पूर्ण होईल, असे महापालिकेने त्या वेळी सांगितले होते. तेव्हा 80 कोटी रुपये खर्च झाले तर नंतर पुन्हा 30 कोटी रुपयांच्या निविदा महापालिकेने प्रसिद्ध केल्या आहेत. हे काम पूर्ण होण्यास आणखी 8 महिने लागतील, असे महापालिकेचा पथ विभाग आता सांगत आहे.