पुणे - महापालिकेने शहरात दररोज सरासरी 32 झाडे लावली आहेत, यावर तुमचा विश्‍वास बसतोय का, हा प्रश्‍न विचारण्याचे कारण म्हणजे महापालिकेच्या हद्दीत गेल्या वर्षभरात तब्बल 11 हजार 600 झाडे नव्याने "उगवली' आहेत. ती पर्यावरण अहवालात ! गेल्या वर्षी हा आकडा केवळ 80 होता.
पुण्यात रस्त्याची रुंदी वाढली नाही, की त्यांचा दर्जा सुधारला नाही. विकास प्रकल्पांचा मंदावलेला वेग वाढेना, ठिकठिकाणची अतिक्रमणे वर्षानुवर्षे जागची हलेना. पण महापालिकेचे वृक्षारोपण मात्र जोमात सुरू असल्याचे नुकत्याच प्रसिद्ध झालेल्या पर्यावरण अहवालातून दिसून आले आहे.
अकरा हजार झाडे
राज्य सरकारने 50 कोटी झाडे लावण्याचा महत्त्वाकांक्षी उपक्रम हाती घेतला आहे. पर्यावरण संतुलनासाठी 33 टक्के क्षेत्र वृक्षाच्छादित असणे आवश्यक आहे. त्यासाठी प्रत्येक खात्याबरोबरच स्थानिक स्वराज्य संस्थांनाही झाडे लावावी, असा फतवा सरकारने काढला आहे. सरकारच्या प्रत्येक घटकाला त्यासाठी लक्ष्यदेखील निश्‍चित करून दिले आहे. महापालिकेलाही त्यानुसार वर्षभरात 10 हजार झाडे लावण्याचे लक्ष्य दिले आहे. त्यापैकी अकरा हजार झाडे पर्यावरण अहवालात "उगवली' असल्याचे दिसते.
महापालिकेचे वृक्षारोपण सुसाट
शहरात 2015 मध्ये सात हजार 926 झाडे लावली, तर 2016 मध्ये ही संख्या आठ हजार सहा झाली. या वर्षभरात महापालिकेने जेमतेम 80 नवीन झाडे लावली. म्हणजे सरासरी एका महिन्यात सहा ते सात वृक्ष लागवड केली. या वर्षी महापालिकेने सुसाट वेगाने वृक्षारोपण केल्याने 80 वरून ही संख्या 11 हजार 660 पर्यंत वाढली. या हिशेबाप्रमाणे महापालिकेने दिवसाला सरासरी 32 झाडे लावली आहेत. प्रत्यक्षात ही झाडे कुठे लावली, त्यांची सद्यःस्थिती काय, याचे कोणतेही स्पष्टीकरण या अहवालात दिसत नाही.
शहरात किमान झाडे किती हवीत?
शंभर चौरस मीटर जमिनीवर किमान एक झाड असले पाहिजे, असे नगरविकास विभागाने 2009 मध्ये प्रसिद्ध केलेल्या परिपत्रकात नमूद केले आहे. त्या आधारे पुण्याच्या क्षेत्रफळानुसार 33 लाख 15 हजार 600 झाडे असणे आवश्यक आहे.
पुण्याचे क्षेत्रफळ (हेक्‍टरमध्ये) ......... 331.56 चौरस किलोमीटर
शहराची लोकसंख्या ....................... 35 लाख
झाडांची संख्या .............................. 38 लाख 60 हजार 55
""शहरात गेल्या वर्षी दहा हजार वृक्षलागवडीचे लक्ष्य दिले होते. या वर्षी हे लक्ष्य अजून वाढले आहे. त्यामुळे झाडांची संख्या वाढत असल्याचे दिसते. ही सर्व झाडे स्थानिक जातीची आहेत.''
- अशोक घोरपडे, उद्यान अधीक्षक
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.