माळेगाव - बारामती औद्योगिक विभागामध्ये आरटीओ कार्यालयाच्या समोरील राजलक्ष्मी लॉजमध्ये अवैद्य वेश्या व्यवसाय सुरू असल्याची माहिती पुढे आली आहे. या प्रकरणी बारामतीचे उपविभागीय पोलीस अधिकारी गणेश इंगळे यांच्या विशेष पथकाने अचानकपणे राजलक्ष्मी लॉजवरती छापा टाकला, या कारवाईमध्ये तीन पुरुष व स्त्रिया अवैद्य वेश्या व्यवसाय करताना आढळून आल्या. त्यानुसार पोलीस पथकातील पोलीस हवलदार शिवदास काटकर यांनी आज बारामती तालुका पोलीस ठाण्यात संबंधित व्यावसायिका विरुद्ध फिर्याद दिली.

त्यामध्ये किरण बापू पाटील( रा. हाजी मलंग रोड एकविरा देवी पिसवली ता. भिवंडी, ठाणे), युवराज लोखंडे (पूर्ण नाव पत्ता माहित नाही), विठ्ठल चव्हाण (पूर्ण नाव माहित नाही, सध्या रा. राजलक्ष्मी लॉज, बारामती.) या संशयित आरोपींचा समावेश आहे. पोलिसांनी वरील आरोपींविरुद्ध स्त्रिया व मुली अलैंगिक व्यापार प्रतिबंध अधिनियम 1956 चे कलम 3,4,5,6,7 प्रमाणे गुन्हा दाखल केला. वरील गुन्ह्याची व्याप्ती विचारात घेता तालुका पोलीस ठाण्याचे पोलीस निरीक्षक महेश ढवाण यांनी अधिकचा तपास सुरू केला आहे.