पुणे : भिडेवाड्यात वाढलेला मद्यपी लोकांचा वावर आणि त्यामुळे तेथे घडणारे गैरप्रकार तत्काळ थांबविण्यात यावेत, अशी मागणी भिडेवाडा बचाव मोहीम या संघटनेतर्फे पोलिस आयुक्त अभिताभ गुप्ता यांच्याकडे करण्यात आली आहे याबाबत संघटनेतर्फे आयुक्त गुप्ता यांना निवेदन देण्यात आले.महात्मा फुले व सावित्रीबाई फुले यांनी देशातील मुलींची पहिली शाळा भिडे वाडा येथे सुरू केली होती. हे ठिकाण राष्ट्रीय स्मारक व्हावे, यासाठी अनेक सामाजिक संघटनाचा मागील काही वर्षापासून लढा सुरू आहे, असे असताना या अतिशय महत्वाच्या ठिकाणी मद्यपी व्यक्तींचा वावर वाढला असून तेथे दारूच्या बाटल्या , वेफर्सची पाकिटे, सिगारेटची थोटके अशा वस्तूंचा खच पडल्याचे वृत्त प्रसिद्ध झाले होते.

या पार्श्वभूमीवर भिडेवाडा बचाव मोहीम या संघटनेचे संस्थापक प्रशांत फुले, पाक्षिक अरिहंतच्या संपादिका गीताई गायकवाड यांनी पोलिस आयुक्त अमिताभ गुप्ता यांना भेटून याबाबतचे निवेदन दिले. याप्रकरणाची गांभीर्याने दखल घेऊन तपास करण्यासाठी नवीन पोलिस अधिकाऱ्याची नियुक्ती केली जाईल. त्यांच्या तपासानंतर पुढील कारवाई करू, असे सांगून तेथे जाऊन आश्वासन पोलिस आयुक्त गुप्ता यांनी दिले. दरम्यान, पुणे महापालिकेने वाड्याच्या सुरक्षेसाठी येथे सुरक्षारक्षक नेमावा. भिडे वाड्याचे राष्ट्रीय स्मारक उभारून येथे पुन्हा मुलींसाठी शाळा सुरु करावी, अशी मागणी प्रशांत फुले यांनी महापालिका प्रशासनाकडे केली आहे.