पौड, ता. १ : मुळशी तालुक्यातील रिहे-मोरेवाडी भागात दहशत पसरवणाऱ्या मंगेश पालवे आणि त्याच्या इतर चार साथीदारांवर ‘मकोका’अंतर्गत कारवाई करण्यात आली. ही माहिती हवेलीचे उपविभागीय पोलिस अधिकारी सुनीलकुमार पुजारी यांनी दिली.
मंगेश नामदेव पालवे, अथर्व नितीन मोरे, हर्षद संतोष मोरे, गणेश सुनील मोरे (सर्व रा. मोरेवाडी रिहे ता. मुळशी) आणि योगेश प्रकाश देवकर, ( रा. धानोरी पुणे, मूळ रा. होंबळ सांगवी, ता. आष्टी) अशी कारवाई झालेल्यांची नावे आहेत. गावातील नागरिकांना मारहाण करणे, वाहने फोडणे, नागरिकांच्या अंगावर पिटबुल जातीचे कुत्रे सोडणे या गुन्ह्यात त्याला अटक होऊन त्याच्यावर यापूर्वीही ‘मकोका’अंतर्गत कारवाई झाली होती. त्यातून त्याला जामीन झाला होता. बाहेर आल्यानंतर त्याने पुन्हा मोरेवाडीतील नागरिकांमध्ये दहशत निर्माण करायला सुरुवात केली. काही महिला, पुरुषांना मारहाण केली होती. या वेळी मोरेवाडीतील नागरिकांनी एकवटून पौड पोलिस ठाणे येथे येऊन त्याच्यावर कठोर कारवाईची मागणी केली होती. त्यावेळी परिस्थितीचे गांभीर्य लक्षात घेऊन पोलिस अधीक्षक संदीपसिंग गिल, अपर पोलिस अधीक्षक डॉ. भूषण कुमार, हवेलीचे उपविभागीय पोलिस अधिकारी सुनीलकुमार पुजारी यांच्या मार्गदर्शनाखाली पौडचे निरीक्षक संतोष गिरीगोसावी, सहाय्यक निरीक्षक संदीप चव्हाण, पोलिस हवालदार प्रशांत बुनगे, हनुमंत शेंडगे, गणेश पवार, अल्ताब हवालदार, स्थानिक गुन्हे शाखेचे सहाय्यक फौजदार महेश बनकर यांनी पाचही जणांना अटक करून त्यांच्यावर ‘मकोका’ची कारवाई करण्यासाठी विशेष प्रयत्न केले.