पिंपरी : कोरोना विषाणूंच्या वाढता संसर्ग रोखण्यासाठी संचारबंदी लागू करण्यात आलेली असतानाच डासांच्या वाढत्या प्रादुर्भावामुळे शहरातील सहा स्पॉट पोलिसांना नाकाबंदी करण्यासाठी त्रासदायक ठरत असल्याचे समोर आले आहे. 

बातम्या ऐकण्यासाठी डाऊनलोड करा ई-सकाळचे ऍप

डासांच्या वाढत्या त्रासामुळे संध्याकाळी सहा ते पहाटे सहा यावेळेत काम करणारे पोलिस कर्मचारी हवालदिल झाले असून, डासांपासून बचाव करण्यासाठी त्यांना अनेक उपाय करावे लागत आहे. 

ही आहेत ठिकाणे

शहरातील दापोडी, बोपोडी, चिंचवड परिसरातील गणेश विसर्जन घाट, रावेत परिसरातील भोंडवे कॉनर्र, भोसरी परिसरातील बनाचा ओढा परिसर आणि मोशी टोलनाका परिसरात असणाऱ्या नाकाबंदीच्या ठिकाणांवर संध्याकाळी सहानंतर तपासणीचे काम करणाऱ्या पोलिस कर्मचाऱ्यांना डासांचा त्रास सहन करावा लागत आहे. दरम्यान, डासांच्या त्रासापासून सुटका करुन घेण्यासाठी ड्युटीवर असणारे पोलिस कर्मचारी ओडोमॉस क्रिमचा वापर करणे, परिसरात लाकडे जाळून धूर करणे, पंखा लावणे अशा प्रकारचे उपाय करत आहेत. मात्र, डासांच्या त्रासापासून त्यांची सुटका होत नसल्याने रात्रीच्या वेळेत काम करणारे कर्मचारी हैराण झाले आहेत. 

पुण्याच्या बातम्या वाचण्यासाठी येथे ► क्लिक करा

यामुळे वाढलेत डास 

नाकाबंदी करण्यासाठी असलेले हे सहा स्पॉट नदीलगतच्या परिसरात आहेत. गेल्या काही दिवसांपासून पवना, मुळा नदीमध्ये मोठ्या प्रमाणात जलपर्णी वाढली आहे. त्यामुळे नदीपात्रालगतच्या परिसरात मोठ्या प्रमाणात डास वाढले आहेत. कोरोनाचा वाढत्या प्रादुर्भावामुळे महापालिका प्रशासनातल्या आरोग्य विभागातील कर्मचारी त्याच कामामध्ये गुंतले आहेत. त्यामुळे नदीमधील जलपर्णी काढण्याकडे लक्ष दिले जात नसल्यामुळे ही समस्या वाढली आले. 

पुण्याच्या बातम्या वाचण्यासाठी येथे ► क्लिक करा

दरम्यान, नदीमधील जलपर्णी काढून टाकावी, त्या लगतचा परिसर स्वच्छ ठेवावा, डास असणाऱ्या परिसरात औषधांची फवारणी करणे असे उपाय महापालिका प्रशासनाने तत्काळ करणे अपेक्षित आहे, त्यामुळे या भागातील डास कमी होतील आणि नाकाबंदीचे काम करणे पोलिसांना सुसह्य होईल, अशी भावना या परिसरात कार्यरत असणाऱ्या पोलिस कर्मचाऱ्यांनी व्यक्‍त केली.