गुळुंचे (पुणे) : कोरोना स्वॅब तपासणीसाठी हाय रिस्क व लो रिस्क संपर्कातील काही लोक आरोग्य सेवकांना नकार देत आहेत. त्यातून कोरोना विषाणूचा संसर्ग वाढण्याची शक्यता आहे. त्यामुळे कोरोना रुग्णांच्या संपर्कात आलेले जे लोक कोरोना तपासणीसाठी नकार देत असतील, त्यांच्या दारात आता पोलिसांची गाडी येईल व त्यांना कोरोना तपासणीसाठी घेऊन जाईल, अशी स्पष्ट भूमिका पुरंदरच्या तहसीलदार रुपाली सरनोबत यांनी घेतली. त्यामुळे कोरोना तपासणीसाठी नकार देणाऱ्या लोकांचे धाबे दणाणले आहेत.

पुण्याच्या इतर बातम्या वाचण्यासाठी येथे क्लिक करा
 
गुळुंचे (ता. पुरंदर) येथे गेल्या काही दिवसात आठ जणांच्या अँटिजेन टेस्ट पाझिटिव्ह आल्या आहेत, तर एकाचा मृत्यू झाला आहे. कोरोना संक्रमणाची वाढती साखळी तोडण्यासाठी रुग्णांच्या संपर्कात आलेल्या लोकांनी स्वतः होऊन तपासण्या करून घेणे गरजेचे आहे. तसेच, स्वतः विलग राहणे आवश्यक आहे. मात्र, तरीही काहीजण नियमांचे पालन करत नसल्याचे दिसून आले. त्यामुळे तहसीलदार सरनोबत यांनी स्पष्ट भूमिका घेतली आहे. येथील आढावा बैठकीत त्यांनी विविध सूचना केल्या. कंटेनमेंट झोन तयार करून तेथे तातडीच्या सेवा सुरू ठेवाव्यात, व्यापाऱ्यांनी मास्क व सॅनिटायझरचा वापर करावा, सार्वजनिक ठिकाणी स्वच्छता ठेवावी व सार्वजनिक ठिकाणे मोकळी ठेवावीत, असे आवाहन तहसीलदार सरनोबत यांनी केले. 

पुण्यात चार लाख नागरिकांना ई पास

या वेळी सरपंच संभाजी कुंभार, सदस्य संतोष निगडे, ग्रामसेवक जयेंद्र सुळ, पोलिस पाटील दीपक जाधव, आरोग्य सेविका अनिता नेवसे, अक्षय निगडे, आशा स्वयंसेविका मीना निगडे आदी उपस्थित होते. दरम्यान, तलाठी महाजन हे कोरोना काळात उपस्थित राहत नसल्याने त्यांची तक्रार करण्यात आली. यावर तातडीने निर्णय घेण्याचे आश्वासन सरनोबत यांनी दिले. ग्रामसेवकांनी मुख्यालयी राहण्याबाबत अक्षय निगडे यांनी मागणी केली. परंतु, तशी अट नसल्याचे तहसीलदारांनी सांगितले.

खडकवासला धरणक्षेत्रात पावसाची विश्रांती

दरम्यान, आरोग्य सेवक बापूराव भंडलकर यांची बदली झाली असून, त्यांना होळ (ता. बारामती) येथे नियुक्ती देण्यात आली आहे. कोरोना काळात बापू यांनी चांगले काम केले. सध्या गावात आरोग्य सेवकांचे पद रिक्त आहे. त्यामुळे कामाचा भार आशा स्वयंसेविकांवर पडत असल्याने बापूंना पुन्हा गुळुंचे येथे नियुक्त करण्याची मागणी करण्यात आली.