इंदापूर : मराठा आरक्षणाचा मुद्दा चांगलाच तापल्याचे आता पाहायला मिळत असून इंदापूर तालुक्यातील गलांडवाडी नंबर एक येथे मशाल मोर्चा काढीत गावामध्ये सर्वपक्षीय राजकीय नेत्यांना गावात प्रवेशबंदी करण्यात आल्याच्या आशयाचे फलक गावच्या प्रवेशद्वारावर लावण्यात आले.

एक मराठा लाख मराठा', 'आरक्षण आमच्या हक्काचे नाही कोणाच्या बापाचे' या मागणीसह येथील मराठा समाजाच्या बांधवांनी आरक्षणासाठी जालना जिल्ह्यातील अंतरवाली सराटी येथे मनोज जरांगे पाटील यांनी केलेल्या आवाहना नुसार समाजबांधवांनी पाठिंबा देण्यासाठी व आरक्षण विषयक जनजागृतीसाठी शुक्रवारी (ता.15) रोजी रात्री मशाल मोर्चा काढण्यात आला.यामध्ये महिला, पुरुष, तरुण मोठ्या संख्येने सहभागी झाले होते.

मशाल मोर्चाची सुरवात छत्रपती धर्मवीर संभाजीराजे यांच्या पूर्णाकृती पुतळ्यापासून होत.जिल्हा परिषद शाळा, गावातील मुख्य चौक, विठ्ठल रुक्मिणी मंदिर व पुन्हा छत्रपती धर्मवीर संभाजी महाराज पूर्णाकृती पुतळा समोर सांगता झाली.यावेळी सदर मागण्यांबाबतचे निवेदन तहसीलदार श्रीकांत पाटील यांनी स्वीकारले.