मंचर - आंबेगाव तालुक्यातील सातगाव पठार भागात गेली आठ दहा दिवस दररोज पाऊस पडत आहे. ढगाळ हवामान व पावसामुळे खरीप हंगामातील फुलोऱ्यात आलेले सहा हजार एकर क्षेत्रातील बटाटा पिकाला धोका होण्याची शक्यता आहे. साचलेले पाणी काढून देण्यासाठी शेतकऱ्यांची लगबग सुरु आहे. पावसाने उघडीप न दिल्यास हाता तोंडाशी आलेला घास हिरावून जात असल्याने शेतकरी वर्ग हवालदिल झाला आहे.

आदर्शगाव कुरवंडी, पेठ, थुगाव, कारेगाव, भावडी, पारगाव तर्फे खेड, कोल्हारवाडी आदी गावे बटाट्याचे आगर म्हणून ओळखली जातात. यापूर्वी दरवर्षी दहा हजार एकर क्षेत्रात खरीप हंगामात शेतकरी बटाटा लागवड करत होते. पण बाजारभावात स्थिरता नसल्याने व उत्पादन खर्च भागविण्यासाठी शेतकर्यांना कसरत करावी लागते. त्यामुळे गेल्या तीन वर्षापासून बटाटा लागवड क्षेत्रात घट होत चालली आहे. सोयाबीन, मका, वटाणा आदी पिकाकडे शेतकरी वळला असल्याने या पिकाचे लागवड क्षेत्र वाढत चालले आहे.

जूनच्या शेवटच्या आठवड्यात व जुलैच्या पहिल्या आठवड्यात येथील बटाटा उत्पादक शेतकऱ्यांनी बटाटा लागवड केली. आता सदर बटाटा काढणी योग्य झाला आहे. पण बटाटा काढणीचे काम पावसामुळे रखडले आहे. परिणामतः ३०० एकर क्षेत्रातील बटाटे जमिनीतच सडण्याची भीती भावडी येथील बटाटा उत्पादक शेतकरी अशोक बाजारे यांनी व्यक्त केली.

'ता.२१ जुलै ते ५ ऑगस्ट या कालावधीत पाच हजार ७०० एकर क्षेत्रातील पिक फुलोऱ्यात आहे. जमिनीत बटाट्याची वाढ सुरु झाली आहे. पण पडत असलेला पाऊस हि अडचणीचा ठरू शकतो. या पिकात साचलेले पाणी काढून देण्याचे काम सुरु आहे.' असे पेठ येथील शेतकरी राम तोडकर यांनी सांगितले.

'सातगाव पठारभागात गेली आठवडाभर सततच्या पावसाने बटाटे काढणीची कामे खोळंबली आहेत. चिखल झाल्यामुळे पिकात जाता येत नाही. काही शेतकऱ्यांचे बटाटे खराब झाले आहेत. कृषी विभागाने या परिसराचा पाहणी दौरा करून ताबोडतोब पंचनामे सुरु करावेत.'

- मनीषा तोत्रे, सरपंच आदर्शगाव कुरवंडी (ता.आबेगाव)