पिंपरी - पिंपरी-चिंचवड नवनगर विकास प्राधिकरणाचा सौरऊर्जा प्रकल्प गेल्या चार महिन्यांपासून इन्व्हर्टर नादुरुस्त झाल्याने बंद पडला आहे. त्यामुळे प्राधिकरणाला दरमहा लाखो रुपयांचा भुर्दंड सोसावा लागत आहे. 

प्राधिकरणाच्या आकुर्डी येथील पर्यावरणपूरक इमारतीत २०१२ मध्ये सौरऊर्जा प्रकल्प विकसित करण्यात आला. प्राधिकरण कार्यालयाकडून फेब्रुवारी २०१३ पासून त्याचा प्रत्यक्ष वापर सुरू झाला. संबंधित प्रकल्पाच्या माध्यमातून दर तासाला सरासरी १०० किलोवॉट एवढी वीजनिर्मिती होते. हा प्रकल्प उभारण्यासाठी १ कोटी ८७ लाख इतका खर्च झाला आहे. प्रकल्पासाठी महाराष्ट्र एनर्जी डेव्हलपमेंट एजन्सी (मेढा) यांच्याकडून सबसिडी मिळालेली असून, प्राधिकरण कार्यालयातील वीजपुरवठा, एसी आणि लिफ्टदेखील सौरऊर्जेवर चालते. 

सौरऊर्जेमार्फत निर्माण होणारी वीज महावितरणच्या मुख्य प्रवाहाला जोडलेली आहे. प्राधिकरण महावितरणची जेवढी वीज वापरते त्यातील सौरऊर्जेतून निर्माण झालेल्या विजेची रक्कम वजा करून उर्वरित वीजबिल प्राधिकरणाला भरावे लागते. सौरऊर्जेमुळे प्राधिकरणाला वीजबिलासाठी दरमहा फक्त १५ हजार इतका खर्च येत होता. मात्र, नोव्हेंबर २०१८ ला सौरऊर्जा प्रकल्पाचा इन्व्हर्टर नादुरुस्त झाला. तेव्हापासून प्राधिकरणाला दरमहा दीड लाख इतके वीजबिल भरावे लागत आहे. इन्व्हर्टरसाठी नव्याने निविदा प्रक्रिया सुरू असली तरी सध्या लोकसभा निवडणूक आचारसंहितेमुळे त्याबाबतचे कार्यादेश देण्यात अडचण येणार पर्यायाने, हा प्रकल्प पुन्हा सुरू होण्यास विलंब लागणार आहे. 

इन्व्हर्टरसाठी निविदा प्रक्रिया सुरू आहे. ही प्रक्रिया पूर्ण झाल्यानंतर सौरऊर्जा प्रकल्प पूर्ववत सुरू होईल.
- प्रभाकर वसईकर, कार्यकारी अभियंता, प्राधिकरण