पिंपरी - सरत्या वर्षाला निरोप देण्यासाठी आणि नव्या वर्षाचे स्वागत करण्यासाठी मंगळवारी (ता. ३१) शहरातील हॉटेल व्यावसायिकांकडून जोरदार तयारी सुरू आहे. अनेक हॉटेलमालकांकडून तरुणाईला आकर्षित करण्यासाठी सजावटीवर भर दिला जात आहे. या दिवसासाठी खास मेनूचेही नियोजन हॉटेल व्यावसायिकांनी केले आहे.

ताज्या बातम्यांसाठी डाऊनलोड करा ई-सकाळचे ऍप

नवीन वर्षाच्या स्वागतासाठी आयटीयन्सकडून पार्ट्यांचे बेत आखण्यात आले आहेत. काहींनी नव्या वर्षाचे स्वागत कुटुंबीयांसमवेत साजरे करण्याचे नियोजन केले आहे, त्यासाठी आपापल्या गावी जाण्याच्या लगबगीत आहेत. गेल्या काही वर्षांत शहरात ‘थर्टिफर्स्ट’ साजरा करण्याच्या प्रमाणात वाढ झाली आहे. यानिमित्त रविवारी (ता. २९) अनेक मॉल्समध्ये खरेदीसाठी तरुणाईने मोठी गर्दी केली होती. काही मॉल्सनी याचे औचित्य साधून विविध वस्तूंवर ५० टक्‍क्‍यांपर्यंत सवलत जाहीर केली. 

हॉटेल व्यावसायिकांकडून अंतर्गत आणि बाह्य सजावटीवर भर दिला जात आहे. फुगे, रंगबिरंगी दिव्यांचा सजावटीसाठी वापर केला आहे. ‘कपल’साठी काहीजणांनी विशेष पॅकेज जाहीर केले आहे. जेवणाचाही नेहमीपेक्षा वेगळा बेत आखण्यात आला आहे. वाकड, हिंजवडी परिसरातील अनेक हॉटेल्समधील बुकिंग फुल्ल झाली आहेत. जेवणाबरोबरच काही ठिकाणी नृत्याच्या कार्यक्रमांचेही आयोजन करण्यात आले आहे.