पुणे - प्रवासी वाहतूक करणाऱ्या खासगी बसला पुण्यात सकाळी आठ ते दुपारी बारा आणि सायंकाळी पाच ते रात्री नऊ वगळून विशिष्ट मार्गांवर प्रवेश करण्यास वाहतूक पोलिसांनी मंजुरी दिली आहे, त्यामुळे प्रवाशांना मोठा दिलासा मिळाला आहे. येत्या १५ नोव्हेंबरपासून या निर्णयाची अंमलबजावणी होणार आहे.  

वाहतूक पोलिसांनी सकाळी सहा ते रात्री दहा दरम्यान खासगी बसना शहरात प्रवेश करण्यास बंदी घालण्याचे सूतोवाच केले होते. त्याला प्रवाशांनी तसेच बस वाहतूकदारांनी विरोध दर्शविला होता. त्यामुळे प्रवाशांची गैरसोय होईल, अशी चिन्हे होती. या पार्श्‍वभूमीवर बंदीच्या निर्णयात सुधारणा करीत गर्दीच्या वेळेतच बसना शहरात प्रवेश करण्यास बंदी घातली. त्या वेळेत बस आल्या तर त्यांनी शहराबाहेर त्या उभ्या करून स्वतःच्या वाहनांद्वारे प्रवाशांना शहरात सोडायचे आहे, असेही त्यांना बजावले आहे.   

सातारा, सोलापूरकडे वाहतूक करणाऱ्या बसना व्होल्गा चौकातून, नगर, नाशिक आणि मुंबईकडे वाहतूक करणाऱ्या बसना संगमवाडीपर्यंत प्रवेश करता येईल. तेथून पुढे मार्गस्थ होण्यासाठी त्यांना विशिष्ट मार्ग ठरवून दिला आहे.