येरवडा - पुणे महापालिकेच्या आरोग्य विभागातील वैद्यकीय अधिकारी पगाराच्या तब्बल ३५ टक्के नॉन-प्रॅक्‍टिसिंग अलाउन्स घेऊनही खासगी प्रॅक्टिस करतात. त्यामुळे आरोग्य विभागाने सर्वच डॉक्‍टरांकडून खासगी प्रॅक्टिस न करण्याचे हमीपत्र लिहून घेतले. मात्र, या हमीपत्रालाही काही डॉक्‍टरांनी केराची टोपली दाखवीत आपली प्रॅक्टिस सुरूच ठेवली आहे.

पुणे महापालिकेच्या आरोग्य विभागात १५६ वैद्यकीय अधिकारी आहेत. यातील अनेक डॉक्‍टर पुणे शहर व पिंपरी-चिंचवडमधील खासगी मोठ्या रुग्णालयांत नियमबाह्य वैद्यकीय व्यवसाय करीत आहेत. याची दखल घेत ‘सकाळ’ने नॉन-प्रॅक्‍टिसिंग अलाउन्स घेणारे वैद्यकीय अधिकारी खासगी प्रॅक्टिस करीत असल्याचे वृत्त दिले होते. त्यानंतर आरोग्यप्रमुखांनी सर्व वैद्यकीय अधिकाऱ्यांकडून खासगी प्रॅक्टिस न करण्याचे हमीपत्र लिहून घेतले होते. मात्र, या हमीपत्राला डॉक्‍टरांनी केराची टोपली दाखविली आहे. अनेक डॉक्‍टर पुणे शहर व पिंपरी-चिंचवड परिसरातील खासगी मोठ्या रुग्णालयांत दुसऱ्याच्या नावाने, तर कुठे स्वत:चे नाव वापरून प्रॅक्टिस करीत आहेत.

सरकारी आरोग्य विभागात कार्यरत असलेले; मात्र नॉन-प्रॅक्‍टिसिंग अलाउन्स न घेणाऱ्या वैद्यकीय अधिकाऱ्यांना ग्रामीण व शहरी भागात काही ठरावीक किलोमीटरच्या क्षेत्रफळात खासगी प्रॅक्टिस करता येते. मात्र, नॉन-प्रॅक्‍टिसिंग अलाउन्स घेणाऱ्यांना तशी प्रॅक्टिस करता येत नसल्याचे पुणे महापालिका आरोग्यप्रमुख डॉ. रामचंद्र हंकारे यांनी सांगितले.