पुणे - मिळकतकरातील ४० टक्क्यांच्या सवलतीबाबत निर्णय घेण्यासाठी मुख्यमंत्र्यांच्या अध्यक्षतेखाली शुक्रवारी (ता. १७) मुंबईत बैठक होणार आहे. त्यातील निर्णयानुसार पुणेकरांना दिलासा मिळणार की आणखीन वाट पाहावी लागणार, हे स्पष्ट होणार आहे. दरम्यान पुणेकरांना पूर्वीप्रमाणेच ही सवलत कायम ठेवावी, अशी मागणी शहर कॉंग्रेसने मुख्यमंत्री एकनाथ शिंदे यांच्याकडे केली आहे.

मिळकतकरात ४० टक्के तर देखभाल-दुरुस्तीत १५ टक्क्यांची सवलत दिली जात होती. मात्र, २०१८ मध्ये देखभाल-दुरूस्तीतील पाच टक्के आणि मिळकतकरात ४० टक्के सवलत सरकारने रद्द केली. याबाबत ‘सकाळ’ने सर्वप्रथम आवाज उठविला होता.

मिळकतकर आकारणीचे वाजवी दर ठरविण्याचे आणि इतर करांची टक्केवारी ठरविण्याचे अधिकार आयुक्तांना आहेत. ते कमी करण्याचे आदेश आयुक्तांना द्यावेत, अशी मागणी कॉंग्रेसचे शहराध्यक्ष अरविंद शिंदे आणि अभय छाजेड यांनी निवेदनाद्वारे केली आहे.