पुणे : पुण्यामध्ये कोरोना प्रसाराचा दर चार टक्क्यापेक्षा खाली आहे. तरी पुणे शहरात अजूनही दुपारी चार नंतर लॉकडाउन होतो. मुंबईत या पेक्षा जास्त प्रसाराचा दर आहे. तरी ते खुले मात्र पुणे बंद का, खरं तर पुणेकरांनी यासाठी धरणे धरायला हवे, असे मत अमृता देवेंद्र फडणवीस यांनी व्यक्त केले.

एरंडवणा येथील मनोहर मंगल कार्यालयातील ‘धागा हॅन्डलूम महोत्सवाचे’ उद्घाटन करताना त्या बोलत होत्या. राष्ट्रीय हातमाग दिवसाच्या औचित्याने हे आयोजन माजी आमदार आणि भाजपाच्या राष्ट्रीय महिला मोर्च्याच्या उपाध्यक्षा प्रा. मेधा कुलकर्णी यांनी केले होते. या प्रसंगी उषा काकडे, मुक्ता टिळक, जिल्हा उद्योग प्रशासकीय अधिकारी ध्रुवकुमार बनसोडे, उमा खापरे, डॉ. आरती निमकर, स्वरदा बापट, अंकिता हर्षवर्धन पाटील, सुहासिनी मेहंदळे, नगरसेवक जयंत भावे आदी उपस्थित होते.

फडणवीस म्हणाल्या,‘‘हातमागावरील कारागिरांनी घडवलेल्या अप्रतिम कलाकुसर या महोत्सवात उपलब्ध आहेत. हातमाग व्यवसायात महिलांचा सहभाग मोठया प्रमाणात आहे. त्यामुळे महिला सक्षमीकरणासाठी हातमाग व्यवसायाला प्राधान्य द्यायला हवे.’’ हातमागावरील घडवलेल्या अप्रतिम कलाकुसरीच्या या महोत्सवात सिल्क आणि कॉटनच्या साड्या, कुर्ते, पर्स, जॅकेट, विविध प्रकारची खेळणी उपलब्ध असल्याचे कुलकर्णी यांनी सांगितले. त्या पुढे म्हणाल्या,‘‘पंतप्रधान नरेंद्र मोदींनी विणकरांसाठी विविध योजना तयार केल्या आहेत. या योजना जास्तीत जास्त विणकरांपर्यंत पोहोचवण्यासाठी आगामी काळात काम केले जाईल.’’ स्नेहल दामले यांनी सूत्रसंचालन केले.