देऊळगाव मही - पुणे जिल्ह्यातील खेड शिवापूर येथे असणाऱ्या दर्ग्यावर दर्शनासाठी गेलेल्या देऊळगाव मही येथील युवकाचा अपघाती मृत्यू झाला. शिवई बसने कारला धडक दिल्याची घटना वाळूज पंढरपूर मार्गावर काल रात्री घडली होती.

अपघातग्रस्त कारमध्ये सदर युवक प्रवास करीत होता. सय्यद जावेद सय्यद हबीब (वय 25)रा. देऊळगाव मही असे मृत युवकाचे नाव आहे. या घटनेमुळे देऊळगाव मही येथील समाजमन हेलावले आहे.

येथील ग्रामपंचायत माजी उपसरपंच सय्यद सईद यांचे बंधू सय्यद जावेद हे पुणे जिल्ह्यातील खेड शिवापुर कमर अली दरवेश दर्ग्यावर दर्शनासाठी गेले होते. दर्शन करून परत येत असताना वाळूज पंढरपूर मार्गावर पाठीमागून येणाऱ्या महामंडळाच्या एमएच १२ व्ही.एफ ४०३४ क्रमांकाच्या शिवाई बसच्या चालका ने बेजबाबदार वाहन चालवत ब्रेझा कार एम एच २८ ए झेड ७५८६ जोरदार धडक दिली.

या अपघातात सदर कार तब्बल सत्तर ते ऐंशी फूट फरपटत गेली, हा अपघात भयंकर होता की ब्रेजा कारचे अक्षरशःचुराडा झाली. या अपघातात देऊळगाव मही येथील तरुण सय्यद जावेद याचा घटनास्थळीच मृत्यू झाला. इतर चार जण गंभीर जखमी अवस्थेत संभाजीनगर येथे रुग्णालयात भरती करण्यात आले. सय्यद जावेद याच्या अपघाती मृत्यूने देऊळगाव मही परिसरात हळहळ व्यक्त होत आहे.