पुणे, ता. १४ : ‘‘नावीन्यपूर्ण कल्पना व नव तंत्रज्ञांना योग्य व्यासपीठ आणि योग्य व्यवस्था निर्माण करण्यासाठी ‘पुणे ॲग्री हॅकेथॉन’ स्पर्धेचे आयोजन करण्यात येत आहे. विद्यार्थ्यांचा वैज्ञानिक दृष्टिकोन वाढीस लावण्यासोबतच वैज्ञानिक संशोधनाला प्रोत्साहन मिळण्यासाठी ही स्पर्धा उपयुक्त ठरेल,’’ असा विश्वास जिल्हाधिकारी जितेंद्र डुडी यांनी व्यक्त केला.

पुणे ॲग्री हॅकेथॉन स्पर्धेचे कृषी महाविद्यालयात शुक्रवार (ता. १५)पासून रविवार (ता. १७)पर्यंत आयोजन केले असून जिल्ह्यातील विद्यार्थ्यांनी याचा लाभ घ्यावा, असे आवाहन डुडी यांनी केले. या स्पर्धेत मृदा आरोग्य आणि व्यवस्थापन, स्मार्ट जल व्यवस्थापन आणि ऑटोमेशन, शेती यांत्रिकीकरण (एआय आणि रोबोटिक्स), कृषी प्रक्रिया आणि मूल्य साखळी, अक्षय ऊर्जा आणि कृषी कचरा व्यवस्थापन, पीक संरक्षण आणि कीड व्यवस्थापन, हवामान अनुकूल आणि डिजिटल शेती, प्रभावी कृषी प्रशासनासाठी एआय, पीक नुकसानीचे मूल्यांकन आणि भाकितासाठी एआय, तंत्रज्ञान, साधने या विषयाशी निगडित नवकल्पना, उत्पादनांचा समावेश असल्याचे डुडी यांनी सांगितले.