प्रफुल्ल भंडारी

दौंड - दौंड तालुका कृषी उत्पन्न बाजार समितीच्या सभापतिपदी भाजप समर्थक गणेश जगदाळे (लिंगाळी) व उपसभापतिपदी शरद कोळपे (दहिटणे) यांची निवड झाली आहे. १९५९ मध्ये स्थापन झालेल्या दौंड बाजार समितीवरील राष्ट्रवादी काँग्रेस पक्षाचे वर्चस्व कमी होऊन पहिल्यांदाच भाजपची सत्ता आली आहे.

एप्रिल २०२३ मध्ये १८ जागांसाठी झालेल्या निवडणुकीत भाजप व मित्रपक्ष पुरस्कृत जनसेवा पॅनेलने ०९ जागा तर राष्ट्रवादी काँग्रेस पुरस्कृत शेतकरी विकास पॅनेलने ०९ जागा जिंकल्या होत्या. दरम्यान मे महिन्यात व्यापारी मतदारसंघातील शेतकरी विकास पॅनेल मधून निवडून आलेले संचालक संपतराव निंबाळकर यांचे निधन झाले. त्यानंतर जनसेवा पॅनेलचे ०९ व शेतकरी विकास पॅनेलचे ०८ , असे संख्याबळ झाले.

दौंड बाजार समिती सभागृहात आज दोन्ही पदांसाठी निवडणूक घेण्यात आली. प्राधिकृत अध्यासी अधिकारी म्हणून सहायक निबंधक (सहकार) हर्षित तावरे यांच्या देखरेखीत ही निवडणूक झाली. सहायक निवडणूक निर्णय अधिकारी म्हणून प्रकाश शितोळे यांनी काम पाहिले. सभापतिपदासाठी जनसेवा पॅनेलचे गणेश जगदाळे व शेतकरी विकास पॅनेलचे बाळासाहेब शिंदे यांनी अर्ज दाखल केले. गुप्त पध्दतीने झालेल्या मतदानात गणेश जगदाळे यांना ९ तर बाळासाहेब शिंदे यांना ८ मते पडली.

उपसभापतिपदासाठी जनसेवा पॅनेलचे शरद कोळपे व शेतकरी विकास पॅनेलच्या वर्षा मोरे यांच्यात लढत झाली. शरद कोळपे यांना ९ तर वर्षा मोरे यांना ८ मते पडली. मतमोजणीनंतर हर्षित तावरे यांनी सभापतिपदावर गणेश जगदाळे व उपसभापतिपदी शरद कोळपे यांची निवड झाल्याचे जाहीर केले.

निवडीनंतर भाजपचे आमदार राहुल कुल यांच्या हस्ते नूतन पदाधिकार्यांचा सत्कार करण्यात आला. गणेश जगदाळे हे लिंगाळी ग्रामपंचायतचे माजी उपसरपंच व विद्यमान सदस्य आहेत. शरद कोळपे हे दहिटणे सोसायटीचे माजी चेअरमन आहेत.