Pune - नगर रस्त्यावरील वाहतूक कोंडी कमी करण्यासाठी गेल्या काही महिन्यांपासून बीरआरटी मार्ग काढून टाकण्याची मागमी केली जात होती. अखेर आजपासून प्रशासनाने गेल्या पावणे तीन वर्षापासून बंद असलेला गुंजन टॉकीज चौक ते हयात हॉटेलपर्यंत बीआरटी मार्ग काढून टाकून हा रस्ता वाहतुकीसाठी खुला करण्यास सुरवात केली आहे. दरम्यान बीआरटी मार्ग प्रयोगिकतत्वावर काढला जात असल्याचा खुलासा प्रशासनाने केला आहे.

नगर रस्त्यावर मेट्रोचे काम सुरू आहे. मेट्रोचे पिलर हे बीआरटी मार्गात आल्याने हा बराचसा भाग वापरता येत नव्हता. या रस्त्यावर रोज सकाळी आणि सायंकाळी प्रचंड वाहतूक कोंडी होऊन वाहनांच्या लांबच्या लांब रांगा लागत आहेत. त्यामुळे बीआरटीचा मार्ग काढून टाकावा अशी मागणी या भागातील नागरिकांकडून केली जात होती.

यासंदर्भात आमदार सुनील टिंगरे यांनी विधिमंडळ अधिवेशनातही प्रश्‍न उपस्थित करून याकडे लक्ष वेधले होते. त्यानंतर यासंदर्भात महापालिका व वाहतूक पोलिसांच्या काही बैठकाही झालेल्या आहेत. त्यानुसार आज महापालिका प्रशासनाने सुमारे ५०० मीटर भागातील बीआरटी मार्गाचे रेलिंग आणि सिमेंटचे छोटे दुभाजक काढण्यास सुरवात केली आहे.

आमदार टिंगरे म्हणाले, ‘‘नगर रस्त्यावरील वाहतूक कोंडी कमी करण्यासाठी बीआरटी मार्ग काढून टाकावा अशी मागणी विधानसभेतही केली होती. त्याचा कायम पाठपुरावा सुरू होता.अखेर महापालिका व वाहतूक पोलिसांनी एकत्र येऊन गुंजन टॉकीज चौक ते हयात हॉटेलपर्यंत बीआरटी मार्ग प्रायोगिकतत्वावर काढला आहे. त्यामुळे नागरिकांना दिलासा मिळेल.

‘‘गुंजन टॉकीज चौक ते हयात हॉटेलपर्यंतचा बीआरटी मार्ग गेल्या पावणेतीन वर्षापासून बंद आहे. त्यामुळे हा मार्ग काढून टाकून हा रस्ता वाहतुकीसाठी खुला करावा अशी मागणी होती. त्यामुळे आज प्रायोगिकतत्वावर याची अंमलबजावणी सुरू केली आहे.’’

- विकास ढाकणे, अतिरिक्त आयुक्त, महापालिका