पुणे : येरवडा येथील ब्लू ग्रास बिझनेस पार्क या इमारतीचे काम सुरू असताना सळयांची बांधणी अंगावर पडून पाच मजुरांचा मृत्यू झाला. ही घटना निष्काळजीपणामुळेच झाली आहे असा निष्कर्ष जिल्हाधिकारी राजेश देशमुख यांच्या अध्यक्षतेखाली नियुक्त केलेल्या तांत्रिक तथ्य शोध समितीने काढला आहे. याचा अहवाल महापालिकेला प्राप्त झाला आहे. (Pune Building Collapse Case Updates)

तथ्य शोध समितीच्या सदस्यांनी येरवड्यातील प्रत्यक्ष घटनास्थळावर जाऊन पाहणी केली. प्रथमिक निष्कर्ष अहवालात ही दुर्घटना निष्काळजीपणामुळे झाल्याचे निदर्शनास आले आहे. त्यामुळे यावर पुढील सुनावणी घेण्यासाठी प्रकल्पाचे विकसक, साइट इंजिनिअर, आर्किटेक्ट तसेच स्ट्रक्‍चरल इंजिनिअर यांना नोटिसा बजाविण्यात आल्या आली असून, २५ फेब्रुवारी रोजी समिती समोर त्यांनी सुनावणी घेतली जाणार आहे. त्यानंतर अंतिम अहवाल समितीकडून सादर केला जाईल, असे समितीचे सदस्य सुधीर कदम यांनी मंगळवारी पत्रकार परिषदेत स्पष्ट केले.

कदम म्हणाले ‘‘या समितीमधील प्रत्येक सदस्यांनी अपघात स्थळाची पाहणी केली त्यात महापालिकेची परवानगी, आर्किटेक्चरचा प्लॅन, प्रत्यक्षात जागेवर त्याच पद्धतीने काम झाले आहे का ?, चुकीच्या पद्धतीने काम केले असेल तर त्या चुका कोणत्या याची माहिती संकलित केली. अपघाताच्या ठिकाणच्या सुरक्षा उपाय योजना, कामासाठी वापरण्यात आलेले साहित्य, काम करताना कशा नियमानुसार झाले का, कामाच्या तपासणीसाठी साइट इंजिनिअर अथवा इतर जबाबदार व्यक्ती होत्या का याची तपासणी समितीने केली आहे.

प्राथमिक अहवालातील आक्षेप

-सळयांच्या जाळ्यांमध्ये उभारण्यात आलेल्या घोड्या (चेअर्स) पुरेशा नव्हत्या.

- जाळयांची बांधणी स्ट्रक्‍चरल ड्रॉईंगनुसार नव्हती.

- या प्रकल्पाच्या राफ्ट फाउंडेशनचे काम करताना लोखंडी जाळीची ठेवणी व बांधणी योग्य नव्हती.

- बांधकामाकडे जाणाऱ्या रस्त्याला सुरक्षा कठडे नव्हते.

- वरची जाळी व खालच्या जाळीत मजुर काम करत असताना त्या जाळ्या स्थिर ठेवण्यासाठी उपाययोजना नव्हती.

- दोन जाळ्यांना आधार देण्यासाठी सळयांचे पिलर उभे करणे आवश्‍यक होते, पण त्याऐवजी केवळ एल आकारातील सळयांचा आधार दिला.