पुणे : पावसाने पुणेकरांसह पिंपरी-चिंचवडकरांची दाणादाण उडाली. शहरातील अनेक सखल भागात पाणी साचल्याने जनजीवन विस्कळित झाले. यातच कामानिमित्त घराबाहेर पडणाऱ्या प्रवाशांना कॅब चालकांच्या सरचार्जने चांगलेच ‘धुतले’. नेहमीच्या दरापेक्षा जास्तीचे दर आकारल्याने प्रवाशांना आर्थिक फटका बसला. काही भागांत येण्यासाठी कॅबचालकांनी नकार दिल्याने प्रवाशांना रिक्षा व ‘पीएमपी’च्या बसवर अवलंबून राहावे लागले.

शहरातील सिंहगड रस्ता, नदीपात्र, धायरी, कल्याणी नगर, डेक्कन आदी भागांत मोठ्या प्रमाणांत पाणी साचले. त्यामुळे त्या भागातील वाहतूक व्यवस्था कोलमडली. शहरात कामानिमित्त येणाऱ्या प्रवाशांची संख्या अधिक असल्याने अनेकांनी कॅबचा पर्याय निवडला. मात्र अनेकांना कॅबचे बुकिंगदेखील उपलब्ध होत नव्हते. कॅबच्या वेटिंगसाठी किमान २० ते २५ मिनिटांचा वेळ लागत होता. तर काही कॅबचालकांनी आधी बुकिंग घेऊन नंतर ते बुकिंग रद्द केले. त्यामुळे प्रवाशांना मनस्ताप सहन करावा लागला. रिक्षाचालकांनी ५० रुपये तर कॅबचालकांनी ८० ते १०० रुपयांपर्यंत जास्तीचे दर आकारल्याने प्रवाशांना आर्थिक फटका बसला.

बुकिंग नाकारण्याचे प्रकार अधिक

कॅबचालकांनी सुरवातीला बुकिंग घेण्यास टाळाटाळ केली. ज्यांनी बुकिंग घेतले ते प्रवासी येताच उडवाउडवीची उत्तरे देऊन बुकिंग रद्द करण्याचा प्रयत्न करीत होते. प्रवाशांना गरज असल्याने त्यांनी ठरलेल्या दरापेक्षा अधिक रक्कम देऊ केल्यास येण्याचे मान्य केले असल्याचा अनुभव अनेक प्रवाशांना आला. कॅब चालकांच्या या मुजोरीचा फटका प्रवाशांना बसला.

मी सिंहगड रस्ता परिसरात राहते. मला माझ्या नातलगांकडे कोथरूड येथे जायचे होते. दुपारी १२ ते सायंकाळी सहा वाजेपर्यंत मी कॅब बुक करण्याचा प्रयत्न केला. मात्र बुकिंग झालेच नाही. काही वेळा बुकिंग झाल्यावर चालकांकडून ते रद्द होत होते.

- प्रियांका जोशी, प्रवासी

मी कात्रज येथील भारती विद्यापीठपासून बावधनला जाण्यासाठी कॅब बुक केली. बुक करताना बावधन येथील पत्ता व्यवस्थित दिला होता. मात्र कॅब चालकांनी सुरुवातीला हुज्जत घातली. नंतर येण्यास नकार दिला. मला जाणे आवश्यक असल्याने मी चालकाला जास्तीचे पैसे देण्यास तयार असल्याचे सांगितले. त्यानंतर तो येण्यास तयार झाला. प्रवाशांची ही एक प्रकारची लूट आहे.

- निशिगंधा चोळके, प्रवासी