पुणे, ता. २१ : चाकण औद्योगिक परिसरातील (एमआयडीसी) वाहतूक कोंडी कायमस्वरूपी फोडण्यासाठी कृत्रिम बुद्धिमत्ता (एआय) आधारित विश्लेषणाच्या आधारे सर्वसमावेशक कृती आराखडा तयार करण्याचे निर्देश जिल्हाधिकारी जितेंद्र डुडी यांनी दिले, तसेच परिसरातील रस्त्यांची दुरुस्ती, खड्डे बुजवणे व प्राथमिक सुधारणांची कामे ३१ ऑगस्टपर्यंत पूर्ण करण्याचे आदेशही त्यांनी सर्व यंत्रणांना दिले आहेत.

चाकण परिसरातील वाहतूक नियोजन, वाहनतळ आणि रस्ते व्यवस्थापनाबाबत आयोजित आढावा बैठकीत ते बोलत होते. या वेळी आमदार बाबाजी काळे, जिल्हा परिषदेचे मुख्य कार्यकारी अधिकारी गजानन पाटील, निवासी उपजिल्हाधिकारी ज्योती कदम यांच्यासह विविध विभागांचे प्रमुख आणि औद्योगिक संघटनांचे प्रतिनिधी उपस्थित होते. एमआयडीसी, सार्वजनिक बांधकाम विभाग, पीएमआरडीए, महामार्ग प्राधिकरण आणि स्थानिक स्वराज्य संस्थांनी परस्पर समन्वयाने निर्धारित कालमर्यादेत कामे पूर्ण करावीत, असे आवाहन जिल्हाधिकारी डुडी यांनी केले.

महत्त्वाचे निर्णय आणि सूचना :
‘एआय’द्वारे अभ्यास : वाहतूक प्रवाह, वाहनांची संख्या व कोंडीची ठिकाणे यांचे ‘एआय’द्वारे आभासी मॉडेल तयार करून पुढील शुक्रवारपर्यंत आराखडा तयार करावा. सप्टेंबरच्या पहिल्या आठवड्यात मान्यता घेऊन तीन ते चार महिन्यांत कामे पूर्ण केली जातील.

अतिक्रमण निर्मूलन : वाहतूक कोंडी होणाऱ्या १९ किलोमीटरच्या पट्ट्यातील अतिक्रमणांचे संयुक्त पंचनामे करून नोटिसा बजावाव्यात. पुढील शुक्रवारपासून प्रत्यक्ष कारवाई सुरू करावी.

तातडीची रस्ते दुरुस्ती : खड्डे बुजवणे, साइड पट्टे-शोल्डर व्यवस्थित करणे, पावसाचा गाळ आणि साचलेला कचरा साफ करणे ही कामे ३१ ऑगस्टपर्यंत प्राधान्याने पूर्ण करावीत.