पुणे - शहरातील स्वारगेट, कोथरूड, सिंहगड रस्त्यासह उपनगरांमधील विविध भागात नागरिकांना बुधवारी (ता. ३१) वाहतूक कोंडीला सामोरे जावे लागले. शहरात तीन-चार दिवसांपासून वाहतूक व्यवस्था कोलमडली असून, वाहनचालकांना बराच वेळ वाहतूक कोंडीत अडकून पडावे लागत आहे.

शहरातील पावसामुळे बहुतांश रस्त्यांवर मोठे खड्डे पडले आहेत. वारजे परिसरात सायंकाळी वाहनांचा अपघात झाल्यामुळे रावेतपासून चांदणी चौक आणि कोथरूडपर्यंत वाहतूक कोंडी झाली होती. स्वारगेट आणि सिंहगड रस्त्यावर वाहनांच्या रांगा लागल्याने वाहतूक संथ गतीने सुरू होती.

येरवडा आणि विमानतळ परिसरातही सायंकाळी वाहतूक कोंडी झाली. चंदननगर परिसरात टाटा गार्डनजवळ सायंकाळी दोन वाहने बंद पडली. लोणीकंद येथील केसनंद रस्त्यावर मिक्सर बंद पडल्याने तर, सातारा रस्त्यावरील सहकारनगर परिसरात वाहनाचा अपघात झाल्यामुळे वाहतूक कोंडी झाली. मुंढवा केशवनगर भागात रस्त्यावर खड्डे पडले आहेत. त्यामुळे कोंडीतून मार्ग काढताना वाहनचालकांची दमछाक झाली.

खडकवासला धरणातून मुठा नदीत पाण्याचा विसर्ग वाढविण्यात आला होता. डेक्कन परिसरातील भिडे पूल आणि नदीपात्रातील रस्ता पाण्याखाली गेला आहे. नदीपात्रातून जाणारा हा रस्ता वाहतुकीसाठी बंद होता. परिणामी जंगली महाराज रस्त्यावर आणि पेठांमधील अंतर्गत रस्त्यांवर वाहतूक कोंडी झाली. महापालिका आणि वाहतूक पोलिसांनी या वाहतूक कोंडीवर मार्ग काढावा, अशी मागणी नागरिकांकडून केली जात आहे.

सिग्नल बंदचा वाहतुकीवर परिणाम

शहरात काही प्रमुख रस्त्यांवरील सिग्नल दोन दिवसांपासून बंद आहेत. त्याचाही परिणाम वाहतुकीवर झाल्याचा दिसून आला. दरम्यान, काही रस्त्यांवर वाहनांच्या अर्धा ते एक किलोमीटरपर्यंत रांगा लागल्याने सिग्नल बंद करून वाहतूक सोडली जात आहे, असे वाहतूक पोलिसांकडून सांगण्यात आले.

किनारा चौक ते चांदणी चौक रस्त्यावर वाहतूक कोंडीची कारणे -

- वनाज मेट्रो स्थानक परिसरात रस्त्यावर पार्किंग

- माल वाहतूक व खासगी प्रवासी वाहनांचे पार्किंग

- अण्णा भाऊ साठे चौकाजवळ बस स्थानकावर दोनपेक्षा अधिक बस आल्या की वाहनांची रांग लागते.

- परमहंस नगर सिग्नल चौक, सीटी हॉस्पिटलजवळ रस्त्यावर दुरुस्तीसाठी आलेल्या वाहनांचे पार्किंग.

- डीपी रस्त्यावर, सीएनजी पंप, वनाजकडे वळणाऱ्या वाहनांमुळे कोंडी.

- शृंगेरी मठ रस्ता येथून पौड रस्त्यावर वाहने ये-जा करतात. त्यावेळी रस्ता ब्लॉक होतो.

शहरातील रस्त्यांवर ५५४ ठिकाणी खड्डे

वाहतूक पोलिसांकडून शहरातील रस्त्यांवरील खड्ड्यांची पाहणी करण्यात आली. त्यात ३१७ चौकांमधील रस्त्यांवर ५५४ ठिकाणी खड्डे पडल्याचे आढळून आले आहे. या खड्ड्यांची दुरुस्ती करण्यात यावी, याबाबत पोलिस आयुक्त अमितेश कुमार यांनी महापालिका प्रशासनाला दिले आहे. परंतु सध्या पावसामुळे खड्डे बुजविण्यास विलंब होत आहे, अशी माहिती पोलिस उपायुक्त रोहिदास पवार यांनी दिली.

शहरात पावसामुळे खड्डे पडले आहेत. रस्ते खराब झाल्यामुळे वाहतूक मंदावली आहे. वाहनांच्या रांगा लागल्यानंतर सिग्नल बंद करून वाहतूक सोडली जात आहे.

- रोहिदास पवार, पोलिस उपायुक्त, शहर वाहतूक शाखा.