Pune - सावकारी लायसन्स मिळवण्यासाठी लागणारा प्रस्ताव तयार करुन तसेच पाठपुरावा करण्यासाठी पन्नास हजार रुपये लाच मागणाऱ्या वेल्हे सहाय्यक निबंधक सहकारी संस्थेतील लिपीकाला लाचलुचपत प्रतिबंधक विभागाने अटक केली असल्याची माहिती वेल्हे पोलीस स्टेशनचे सहाय्यक पोलीस निरीक्षक मनोज पवार यांनी दिली.

पुणे एसीबीच्या पथकाने ही कारवाई शुक्रवारी (ता.१६) रोजी केली आहे.काल रात्री उशिरापर्यंत गुन्हा दाखल करण्याचे काम सुरू होते. पंढरीनाथ मच्छिंद्रनाथ तमनर असे लाच मागणाऱ्या लिपीकाचे नाव असून याबाबत विलास जगन्नाथ पांगारे (रा.वेल्हे) यांनी फिर्याद दिली आहे.

पोलीस स्टेशन मध्ये दाखल झालेल्या तक्रारीनुसार वेल्हे गावातील रहिवासी विलास पांगारे यांना सावकारी लायसन्स काढायचे होते. या कामासाठी ते २० मे रोजी सहाय्यक निबंधक सहकारी संस्थेच्या वेल्हे येथील कार्यालयात गेले होते.

त्यावेळी लिपीक पंढरीनाथ तमनर यांनी लायसन्ससाठी लागणारा प्रस्ताव तयार करुन, जिल्हा निबंधक कार्यालयात पाठपुरावा करुन लायसन्स मिळवून देण्यासाठी वरीष्ठ कार्यालयासाठी ३० हजार व स्वतः साठी २० हजार रुपये लाचेची मागणी केली.

तक्रारदार पांगारे यांनी याबाबत पुणे एसीबीच्या कार्यालयात तक्रार दिली. या तक्रारीनुसार एसीबीच्या पथकाने २९ मे रोजी वेल्ह्यात येऊन पडताळणी केली असता पंढरीनाथ तमनर यांनी पन्नास हजार रुपयाची लाच मागितल्याचे निष्पन्न झाले.

३० हजार रुपये वरिष्ठ कार्यालयासाठी तर स्वतःसाठी वीस हजार रुपये लाचेची रक्कम अन्य व्यक्तींच्या बँक खात्यात जमा करण्यास सांगितले असल्याचे निष्पन्न झाले लाच मागितल्या प्रकरणे पुणे एसीबीने वेल्हे पोलीस ठाण्यात भ्रष्टाचार प्रतिबंध कायद्या अंतर्गत गुन्हा दाखल करून लिपिकास अटक केली आहे.

लाच लुचपत प्रतिबंधक विभागाचे पोलीस अधीक्षक अमोल तांबे, अप्पर पोलीस अधीक्षक शितल जानवे यांच्या मार्गदर्शनाखाली पुणे विभागाच्या पथकाने केली.अधिक तपास पोलीस निरीक्षक संदीप वऱ्हाडे करीत आहे.

सहाय्यक निबंधक कार्यालयात तील संबंधित लिपिका बाबत अनेक महिन्यापासून अनेक तक्रारी येत होत्या परंतु लिपकास एका राजकीय पक्षाचे पाठबळ असल्याने त्यांच्याविरुद्ध तक्रार देण्यास समोर कोण येत नव्हते या झालेल्या कारवाईवर नागरिकांकडून मोठे समाधान व्यक्त केले जात आहे.