पुणे : राज्यातील ग्रामपंचायत आणि सहकारी संस्थांच्या निवडणुका एकाच कालावधीत होत आहेत. त्यामुळे सहकारी संस्थांच्या निवडणुका येत्या २० डिसेंबरपर्यंत स्थगित करण्यात आल्या आहेत. या संदर्भात राज्य सरकारच्या सहकार विभागाकडून मंगळवारी आदेश जारी करण्यात आला आहे.

राज्य निवडणूक आयोगाने १८ नोव्हेंबर ते २० डिसेंबर या कालावधीत राज्यातील ७ हजार ५१ ग्रामपंचायतींचा निवडणूक कार्यक्रम जाहीर केला आहे. या ग्रामपंचायतीचा निकाल २० डिसेंबर रोजी लागणार आहे. तर, राज्य सहकारी निवडणूक प्राधिकरणाच्या वतीनेही ७ हजार १४७ सहकारी संस्थांच्या निवडणुकांचा कार्यक्रम सुरु आहे. त्यामध्ये ‘अ’ वर्गातील ३८, ‘ब’ १ हजार १७०, ‘क’ ३ हजार १५१ आणि ‘ड’ वर्गातील २ हजार ७८८ सहकारी संस्थांचा समावेश आहे.

ग्रामपंचायत आणि सहकारी संस्थांच्या निवडणुका एकाच कालावधीत सुरु आहेत. त्यामुळे गावागावात तणावग्रस्त परिस्थिती निर्माण होण्याची शक्यता आहे. तसेच, ‘अ’ आणि ‘ब’ वर्गातील सहकारी संस्थांच्या सदस्यांची संख्या अधिक आहे. या सहकारी संस्थांचे कार्यक्षेत्र एक किंवा अनेक तालुक्यांशी संबंधित असल्यामुळे बरेच मतदार मतदानापासून वंचित राहण्याची शक्यता आहे. जास्तीत जास्त मतदारांना निवडणुकीत सहभाग नोंदविता यावा, यासाठी सहकारी संस्थांच्या निवडणुका २० डिसेंबरपर्यंत स्थगित करण्यात आल्याचे सहकार विभागाच्या वतीने स्पष्ट करण्यात आले.

राज्यातील ‘अ’ आणि ‘ब’ वर्गातील सहकारी संस्थांच्या निवडणुका ज्या टप्यावर असतील त्या टप्प्यापासून २० डिसेंबरपर्यंत पुढे ढकलण्यात आल्या आहेत. मात्र, वर्ग ‘क’, ‘ड’ आणि वर्ग ‘इ’ तसेच न्यायालयाने निवडणूक घेण्याबाबत आदेश दिलेल्या सहकारी संस्था वगळण्यात आल्या आहेत. पुढील आदेशानुसार सहकारी संस्थांच्या निवडणुका होतील.

- डॉ. जगदीश पाटील, आयुक्त, राज्य सहकारी निवडणूक प्राधिकरण.

पतसंस्था फेडरेशनची निवडणूक स्थगित

राज्य सहकारी पतसंस्था फेडरेशनची निवडणूक सुरू असून, बुधवारी उमेदवारी अर्ज माघार घेण्याचा दिवस होता. परंतु निवडणूक स्थगित झाल्यामुळे पुढील आदेशानंतरच निवडणुकीबाबत निर्णय होणार आहे.