वेल्हे : मी पुन्हा येईल, मी पुन्हा पुन्हा येईल' हे उद्गार होते माजी केंद्रीय मंत्री व हे खासदार प्रकाश जावडेकर यांचे परंतु त्यांचे हे वक्तव्य कोणत्याही राजकीय हेतूतून नसून वेल्हे तालुक्यातील विंझर गाव हे सासंद आदर्श ग्राम योजनेअंतर्गत दत्तक घेतले असून गावच्या सर्वांगीण विकासासाठी पुन्हा पुन्हा येईल असे उद्गार जावडेकर यांनी आयोजित आढावा बैठकीत काढले.

वेल्ह्याच्या इतिहासामध्ये पहिल्यांदाच तालुक्यातील एखादे गाव दत्तक घेतले आहे. विंझर गावास याचा मान मिळाला असून, तालुक्यातील भाजपचे ज्येष्ठ नेते व कृषी उत्पन्न बाजार समितीचे माजी संचालक अण्णा शिंदे यांच्या प्रयत्नातून व पाठपुराव्यामुळे राज्यसभेचे खासदार प्रकाश जावडेकर यांनी विंझर गाव दत्तक घेतले असून आज शनिवार (ता. १५) रोजी आढावा बैठकीचे आयोजन करण्यात आले होते.

याप्रसंगी जावडेकर बोलताना पुढे म्हणाले, 'संपूर्ण गाव आदर्श होण्यासाठी गावकऱ्यांबरोबर स्वतः खासदार यामध्ये लक्ष घालणार असून प्रत्येक महिन्यातून एकदा पूर्ण दिवसभर गावात येऊन केंद्र व राज्य सरकारच्या सर्व योजना प्रभावीपणे राबवणार असून पात्र लाभार्थ्यांना विविध योजनांचा लाभ दिला जाईल. ग्रामीण भागातील या गावांमध्ये प्रामुख्याने शिक्षण, आरोग्य, पाणीपुरवठ्यावर काम करणार असून गाव एका नव्या पातळीवर नेणार असल्याचे जावडेकर यांनी स्पष्ट केले.'

याप्रसंगी अण्णा शिंदे, भोरचे उपविभागीय अधिकारी राजेंद्र कचरे, वेल्ह्याचे तहसीलदार शिवाजी शिंदे, गट विकास अधिकारी पंकज शेळके, तालुका कृषी अधिकारी धनंजय कोंढाळकर, वेल्ह्याचे गटशिक्षणाधिकारी कमलाकांत म्हेत्रे, महावितरण विभागाचे नवनाथ घाटूळे, पोस्ट विभागाचे सहाय्यक अधीक्षक गणेश वडुरकर, विलास जेधे, वेल्ह्याचे सहाय्यक पोलीस निरीक्षक मनोज पवार, विंझरचे सरपंच सुनील भोसले, विलास किर्वे, संभाजी भोसले, राहुल सागर, विनायक लिम्हण, सतीश लिम्हण, आधी सह सर्व विभागाचे विभाग प्रमुख उपस्थित होते.

गावातील बैठकीनंतर येथील अमृतेश्वर महाविद्यालयांमध्ये विविध बचत गटांची बैठक आयोजित करण्यात आली होती याप्रसंगी अमृतेश्वर कला महाविद्यालयाचे अध्यक्ष प्रदीप फडके, प्राचार्य डॉ.संजीव लाटे , भाजपचे जिल्हाध्यक्ष गणेश भेगडे,वेल्हे तालुका भाजपचे अध्यक्ष सुनील जागडे, रवी दसवडकर, आदीसह नागरिक मोठ्या संख्येने उपस्थित होते.

दरम्यान विंझर गावच्या वतीने खासदार प्रकाश जावडेकर यांचे ढोल ताशांच्या गजरात स्वागत करण्यात आले. ग्रामपंचायत स्वागत कमान ते ग्रामपंचायत कार्यालयापर्यंत फुलांचा वर्षाव करण्यात खासदारांवर करण्यात आला.