पुणे : पुणे महापालिकेच्या अधिकारी व कर्मचारी, शिक्षण विभागातील शिक्षक व इतर कर्मचाऱ्यांची दिवाळी जोरदार होणार आहे. पालिका कामगारांना पगारावर ८.३३ टक्के बोनस दिला जाणार असून, त्यासह १७ हजार रुपयांचे सानुग्रह अनुदान आणि तीन हजार रुपयांचा कोव्हीड भत्ता देण्याचा निर्णय पक्षनेत्यांच्या बैठकीत घेतला आहे, अशी माहिती महापौर मुरलीधर मोहोळ यांनी दिली.

पुढच्या महिन्यात दिवाळी आलेली असताना त्यासाठी अधिकारी, कर्मचाऱ्यांना बोनस देण्याचा प्रस्ताव आज पक्षनेत्यांच्या बैठकीसमोर मांडण्यात आला होता.

महापौरांच्या अध्यक्षतेखाली झालेल्या बैठकीत हा निर्णय घेतला आहे. उपमहापौर सुनीता वाडेकर, स्थायी समिती अध्यक्ष हेमंत रासने, सभागृह नेते गणेश बिडकर, विरोधी पक्षनेत्या दीपाली धुमाळ, शिवसेना गटनेते पृथ्वीराज सुतार, काँग्रेस पक्ष गटनेते आबा बागूल मनसेचे गटनेते साईनाथ बाबर यावेळी उपस्थित होते.

कोरोनाच्या दुसऱ्या लाटेत महापालिकेच्या कर्मचाऱ्यांनी चांगले काम केले आहे, त्याबद्दल त्यांना विशेष भत्ता देऊन सन्मानित केले पाहिजे अशी मागणी काही नगरसेवकांनी यापूर्वी केली होती. त्यानुसार आजच्या बैठकीत देखील यावर चर्चा करून ३ हजार रुपये भत्ता दिला जाणार आहे. त्याच बरोबर दरवर्षीप्रमाणे कामगारांना ८.३३ टक्के बोनस देण्याचा निर्णय घेतला. दर पाच वर्षांनी सानुग्रह अनुदानाचा करार केला जातो. यंदा हा करार संपल्याने २०२५ पर्यंतच्या कराराला मान्यता देण्यात आली. पुढील पाच वर्षात ८ हजार रुपयांनी यामध्ये वाढ होणार आहे. यंदाच्या दिवाळीत १७ हजार रुपयांचे सानुग्रह अनुदान देण्यात येणार आहे. २०२२ मध्ये १९ हजार, २०२३ मध्ये २१ हजार, २०२४ मध्ये २३ हजार तर २०२५ मध्ये २५ हजार रुपये सानुग्रह अनुदान दिले जाणार आहे.

याचा फायदा महापालिकेच्या सुमारे १६ हजार कर्मचाऱ्यांसह ६६ बालवाडी सेविका, शिक्षण विभागातील प्राथमिकचे ९६ शिपायांनी सलग १७४ दिवस रोजंदारीवर काम केल्याने त्यांनाही याचा लाभ मिळणार आहे, असे मोहोळ यांनी सांगितले.

सुमारे सव्वाशे कोटीचा खर्च

महापालिकेच्या कर्मचाऱ्यांना बोनस, सानुग्रह अनुदान देण्यासाठी अंदाजपत्रकात १४० कोटी रुपयांची तरतूद करण्यात आलेली आहे. सर्व कर्मचाऱ्यांना बोनस, सानुग्रह अनुदान, कोव्हीड भत्ता यासाठी सुमारे १२५ कोटी रुपये लागणार आहेत.