पुणे - लग्नाचे आमिष दाखवून एका तरुणाची २२ लाख रुपयांची फसवणूक केल्याचा प्रकार समोर आला आहे. या प्रकरणी लोणीकंद पोलिस ठाण्यात तरुणीसह दोघांविरुद्ध गुन्हा दाखल करण्यात आला आहे.

याबाबत वाघोली येथील एका ३० वर्षीय तरुणाने लोणीकंद पोलिस ठाण्यात फिर्याद दिली आहे. त्यावरून तरुणीसह जय भगवान रोकडे (दोघे रा. संगमनेर, जि. अहमदनगर) या दोघांविरुद्ध गुन्हा दाखल करण्यात आला आहे.

पोलिसांनी जय रोकडे याला अटक केली आहे. पोलिसांनी दिलेल्या माहितीनुसार, संगमनेर येथील एका तरुणीची सोशल मीडियावर या तरुणासमवेत मैत्री झाली. त्यानंतर या तरुणीने तरुणाला आपल्या जाळ्यात ओढून घरगुती आर्थिक अडचण असल्याचे सांगितले.

पैसे परत करण्याचे आश्वासन देऊन तरुणाकडून वेळोवेळी ऑनलाइन पद्धतीने २२ लाख रुपये घेतले. आर्थिक अडचणीत आलेल्या तरुणाने पैसे परत करण्याची मागणी केली. परंतु तिने तरुणाला उडवाउडवीचे उत्तरे दिली. फसवणूक झाल्याचे लक्षात आल्यानंतर तरुणाने पोलिसांत तक्रार दिली.