पुणे - पुणे शहरातील सिंहगड रोड परिसरातून धक्कादायक घटना समोर आली आहे. परिसरातील स्वीटमार्टमध्ये गोळीबार करण्याचा प्रयत्न झाला. सिंहगड रोड पोलिस ठाण्यात या प्रकरणी तक्रार देण्यात आली आहे. पोलिसांनी या प्रकरणी २ तरुणांना अटक केली. सुरज ब्रह्मदेव मुंडे, असं आरोपीचं नाव असून एक आरोपी त्याचा साथीदार अल्पवयीन आहे..

पोलिसांनी दिलेल्या माहितीनुसार, सिंहगड रोडवर असलेल्या जोधाराम चौधरी यांच्या फुलपरी स्वीट मार्टमध्ये घुसून या दोघांनी एक किलो काजू कतली फुकट मागितली. परंतु चौधरी यांनी पैसे मागितले असता त्या दोघांना या गोष्टीचा राग आला. त्यानंतर सुरज आणि त्याच्या साथीदाराने त्यांच्या जवळील पिस्तूल काढून गोळीबार करण्याचा प्रयत्न केला. त्यांच्या जवळील पिस्तूल जुने असल्याने राऊंड फायर झाले नाही. मात्र दहशत निर्माण व्हावी म्हणून त्यांनी के कृत्य केले.

दहशत निर्माण करून ते दोघेही तिथून पळून गेले. पोलिसांनी घटनास्थळी धाव घेत सीसी टीव्ही फुटेजच्या आधारे या दोघांनाही अटक केली. भारतीय दंडात्मक कलम ३०७ आणि खंडणी अंतर्गत गुन्हा दाखल करण्यात आला आहे.