पुण्यात गेल्याकाही दिवसांपासून कोयता गँगची चर्चा आहे. हातात कोयते घेऊन रस्त्यावर दहशत माजवणाऱ्या तरुणांचे व्हिडीओ मागच्या काही दिवसांपासून समोर येत आहेत. विविध सार्वजनिक ठिकाणी जात या गँगकडून दहशत निर्माण केली जाते आहे. दरम्यान पुण्यातील गर्दीच्या दहशत माजवणाऱ्या याच गँगमधील एका तरुणाला पुणेकरांनी चांगलीच अद्दल घडवली आहे.

पुणे शहराच्या मध्यवर्ती भाग असलेल्या तुळशीबागेत दहशत निर्माण करणाऱ्या एकाला स्थानिकांनी चांगलाच धडा शिकवत चोप दिला आहे. या घटनेचा व्हिडीओ समोर आला आहे. हा व्हिडीओ सध्या व्हायरल होतो आहे. दहशत माजवणाऱ्या दोघांपैकी एक जण पळून गेला, तर दुसऱ्याला नागरिकांनी पकडून पोलिसांच्या ताब्यात दिलं आहे.

पुण्यातील वेगवेगळ्या भागात मागील काही दिवसांपासून ही टोळी दहशत पसरवत आहे.यामुळे अनेक भागात भितीचं वातावरण निर्माण झालं असून नागरिक त्रस्त झाले आहेत. पुणेकरांनी दंडुके हातात घेत या गुंडाना अद्दल घडवली. या प्रकरणाचं सीसीटीव्ही फुटेज समोर आलं आहे.