पुणे : भारत व वेस्टइंडिज यांच्यातील T20 क्रिकट सामन्यावर ऑनलाइन बेटींग घेणाऱ्या सहा जणांना स्वारगेट पोलिसांनी बेड्या ठोकल्या. पोलिसांनी अटक केलेल्या आरोपींकडून मोबाईल, लॅपटॉप, जुगाराचे व अन्य साहित्य असा सव्वा सात लाख रुपयांचा मुद्देमाल जप्त केला. गुलटेकडी परिसरात बुधवारी रात्रीच्या सुमारास हि कारवाई करण्यात आली.न्यायालयाने आरोपींना पाच दिवसांची पोलिस कोठडी सुनावलरी आहे. (Pune Crime News)

अंबादास चंद्रकांत तावस्कर (वय 23, रा. धाराशिव), समीर यशवंत जाधव (वय 41, रा. सोमवार पेठ), धनंजय सुर्यकांत गायकवाड (वय 34, रा. घोरपडी), अनिल रत्नाकर बलकवडे (वय 36, रा. सदाशिव पेठ), दिनेशकुमार मांगीलाल प्रजापती (वय 25), राहुल मीठालाल पालेवाल (वय 25, दोघेही रा. राजस्थान, जोधपुर) अशी अटक केलेल्यांची नावे आहेत. याप्रकरणी पोलिस कर्मचारी मनोज भोकरे यांनी फिर्याद दिली आहे.

पोलिसांनी दिलेल्या माहितीनुसार, भारत व वेस्टइंडिय यांच्या दरम्यान बुधवारी रात्री टि-ट्‌वेंटी क्रिकेट सामाना होता. संबंधित क्रिकेट सामन्यावर गुलटेकडीतील एका सोसायटीजवळ असलेल्या खोलीमध्ये ऑनलाईन बेटींग सुरु असल्याची खबर स्वारगेट पोलिसांना मिळाली. त्यानुसार, स्वारगेट पोलिस ठाण्याचे वरिष्ठ पोलिस निरीक्षक अशोक इंदलकर यांच्या मार्गदर्शनाखाली, सहाय्यक पोलिस निरीक्षक अमोल रसाळ व त्यांच्या पथकाने घटनेच्या ठिकाणी छापा घातला.

त्यावेळी संशयित आरोपी तेथे क्रिकेट सामन्यावर बेटींग करीत असल्याचे पोलिसांच्या निदर्शनास आले. पोलिसांनी त्यांच्याकडील मोबाइल, लॅपटॉप, 13 हजार 900 रुपयांची रोख रक्कम, जुगाराचे साहित्य असा सव्वा सात लाख रुपयांचा ऐवज जप्त केला. संबंधित आरोपींकडून त्यांच्या मोबाईलमध्ये दुसऱ्याच व्यक्तीच्या नावाने घेतलेल्या सीमकार्डचा वापर करुन बेटींग करीत असल्याचे पोलिसांच्या तपासात माहिती पुढे आली.

"क्रिकेट सामन्यावर ऑनलाईन बेटींग करणाऱ्यांना अटक केली आहे. त्यांनी यापुर्वीही बेटींग केली आहे का, त्यांच्या संपर्कात आणखी किती व्यक्ती आहेत व अन्य सखोल माहिती त्यांच्या चौकशीतुन पुढे येईल. त्यानुसार, त्यांच्यावर कारवाई केली जाईल.''

-अशोक इंदलकर, वरिष्ठ पोलिस निरीक्षक, स्वारगेट पोलिस ठाणे.