Pune Crime - एका तरुणीने तिच्या मैत्रिणीला तरुणाने दिल्लीला पळवून नेल्याची तक्रार पोलिसांकडे केली. तिने मैत्रिणीचे दिल्लीतील लोकेशनही पोलिसांना पाठवले. आंतरधर्मीय प्रेमप्रकरणातून हा प्रकार घडल्याच्या तक्रारीमुळे पुणे पोलिसांची झोप उडाली. पोलिसांनी थेट दिल्ली गाठली.

परंतु तपासादरम्यान ‘लव्ह जिहाद’चे हे प्रकरण बनावट असल्याचे स्पष्ट झाले. तक्रारदार तरुणीने प्रियकर तिला त्रास देत असल्याची तक्रार केली होती. परंतु पोलिसांनी दखल न घेतल्याने तरुणीने हे पाऊल उचलल्याचे समोर आले.

तर घडलेला प्रकार असा की, एका तरुणीने मैत्रिणीला येरवड्यातील एका तरुणाने पळवून नेल्याची तक्रार पोलिसांकडे केली होती. सध्या ‘लव्ह जिहाद’ चा बोलबाला सुरू आहे. या तरुणीच्या तक्रारीमुळे पोलिसांनी तक्रारीची गांभीर्याने दखल घेतली. चंदननगर पोलिसांनी तक्रारदार तरुणीकडे चौकशी केली.

तिने अपहरण झालेल्या तरुणीचे नाव, मोबाईल क्रमांक याची माहिती दिली. त्यानुसार पोलिसांनी तपास सुरू केला. परंतु तरुणीने दिलेला मोबाईल क्रमांक बंद लागत होता. त्यामुळे पोलिसांची चिंता वाढली. पोलिसांनी बंद मोबाइलचा डेटा काढला. त्यावरून पोलिस लोहगावमधील त्या तरुणीकडे पोचले.

परंतु तिला याबाबत काहीही माहिती नसून, मोबाईल चार महिन्यांपासून बंद असल्याचे सांगितले. त्यामुळे पोलिसांना तक्रारदार तरुणीवर संशय बळावला. तोपर्यंत तक्रारदार तरुणीने पोलिसांना विश्वास बसावा, यासाठी दिल्लीतील मैत्रिणीचे लोकेशन मागवले. ते अपहरण झालेल्या मैत्रिणीचे असल्याचे सांगितले.

गुन्हे शाखेचे पोलिस उपायुक्त अमोल झेंडे आणि परिमंडळ चारचे पोलिस उपायुक्त शशिकांत बोराटे या संपूर्ण प्रकरणावर लक्ष ठेवून होते. त्यांनी लोकेशनच्या आधारे पोलिसांचे एक पथक दिल्लीला रवाना केले. त्यानुसार पोलिसांना दिल्लीत ती तरुणी सापडली.

पोलिसांनाही या प्रकरणाचा तपास लागल्याचे वाटले. परंतु चौकशीदरम्यान त्या तरुणीने पुण्यातील मैत्रिणीला आपण हे लोकेशन पाठविल्याचे सांगितले. शेवटी पोलिसांनी तक्रारदार तरुणीला पोलिसी खाक्या दाखविला. त्यावेळी तक्रारदार तरुणीने आपणच पोलिसांना अद्दल घडविण्यासाठी हे बनावट अपहरण नाट्य रचल्याचे सांगितले.