Pune Crime - आमच्या भांडणात तु का आला असे म्हणत सिंहगड रस्त्यावरील किरकटवाडी येथील तरुणावर दहा ते पंधरा सराईत गुन्हेगारांच्या टोळीने भर दिवसा मेडीकल दुकानात घुसून जीवघेणा हल्ला केल्याची धक्कादायक घटना घडली आहे.

या हल्ल्यात तरुण गंभीर जखमी झाला असून त्याच्यावर खाजगी रुग्णालयात उपचार सुरू आहेत. ही सर्व घटना सीसीटीव्ही कॅमेऱ्यात कैद झाली असून हवेली पोलीस ठाण्यात याबाबत गुन्हा दाखल करण्यात आला आहे.

सिंहगड रस्त्याला लागून किरकटवाडी फाट्यालगत काही सराईत गुन्हेगार दुसऱ्या एका तरुणाला मारहाण करत होते. त्यावेळी किरकटवाडी येथील स्थानिक तरुणाने मधे जाऊन तरुणाची सुटका केली.

त्यावेळी ते गुन्हेगार तेथून निघून गेले व काही वेळानंतर पुन्हा दहा ते पंधरा गुन्हेगारांना घेऊन आले. किरकटवाडी येथील तरुण मेडिकल दुकानाच्या काऊंटर जवळ थांबलेला होता. त्यावेळी गुन्हेगारांनी त्याला लाथाबुक्क्यांनी व मोठमोठे दगड डोक्यात घालून बेदम मारहाण केली.

शिवीगाळ व हाणामारीचा आवाज ऐकून इतर नागरिक धावत आले परंतु संबंधित गुन्हेगार मोठमोठ्याने शिवीगाळ करत दिसेल त्याला दगड मारत दहशत निर्माण करत होते. भर रस्त्यावर हा प्रकार सुरू असल्याने काही काळ गोंधळ निर्माण झाला होता.

तसेच वाहतूकही थांबली होती. सर्वांना धमकावत ते गुन्हेगार निघून गेल्यानंतर गंभीर जखमी झालेल्या तरुणाला जवळील खाजगी रुग्णालयात दाखल करण्यात आले. याबाबत हवेली पोलीस ठाण्यात गुन्हा दाखल करण्यात आला असून पोलीसांनी पाच ते सहा गुन्हेगारांना अटक केली आहे. याबाबत हवेली पोलीस ठाण्याचे प्रभारी अधिकारी आयपीएस अनमोल मित्तल अधिक तपास करत आहेत.

कडक कारवाई करण्याची मागणी. सराईत गुन्हेगार भर दिवसा येऊन मारहाण करून दहशत निर्माण करत असल्याने नागरिक व व्यावसायिकांमध्ये भीतीचे वातावरण निर्माण झाले आहे. त्यामुळे अशा गुन्हेगारी टोळ्यांवर कठोर कायदेशीर कारवाई करण्यात यावी अशी मागणी स्थानिक नागरिक व व्यावसायिक करत आहेत.