पुणे : पूर्ववैमनस्यातून तलवार व पालघनाने वार करीत दोघांचा खून करण्यात आल्याचा धक्कादायक प्रकार उघडकीस आला आहे. हि घटना शनिवारी पहाटे तीन वाजण्याच्या सुमारास येरवडा येथे घडली. दोघेही सराईत गुन्हेगार असून याप्रकरणी येरवडा पोलिस ठाण्यात गुन्हा दाखल करण्यात आला आहे.

अनिल उर्फ पोपट वाल्हेकर आणि सुभाष उर्फ किसन राठोड अशी खून झालेल्या दोघांची नावे आहेत. पांडू लमाण वस्ती येथे रात्री तीन वाजता ही घटना घडली आहे. येरवड्यातील पांडू लमाण वस्ती येथे वाल्हेकर व राठोड आले होते. त्यावेळी त्यांच्यात पूर्व वैमनस्यातून वाद झाले. त्याच्यावर एकमेकांवर तलवारीने वार करण्यात आले. या घटनेत दोघेही गंभीर जखमी झाले. त्यांना उपचारासाठी रुग्णालयात दाखल करण्यात आले. मात्र उपचारा पूर्वीच त्यांचा मृत्यू झाला.