Pune - बारावीनंतरच्या अभियांत्रिकी आणि तंत्रज्ञान पदवी अभ्यासक्रमाच्या प्रवेशासाठी ऑनलाइन नोंदणी आणि अर्ज सादर करण्यासाठी महाराष्ट्र राज्य सामाईक प्रवेश परीक्षा कक्षाने (सीईटी सेल) अखेर मुदतवाढ दिली आहे. त्यामुळे विद्यार्थ्यांना आता येत्या शुक्रवारपर्यंत (ता. ७) ऑनलाइन अर्ज करता येणार आहे.

सीईटी सेलतर्फे अभियांत्रिकी आणि तंत्रज्ञान पदवी अभ्यासक्रमाच्या (चार वर्ष बी.ई. आणि बी.टेक) ऑनलाइन नोंदणी आणि अर्ज सादर करण्यासाठी सोमवारपर्यंत मुदत होती. परंतु प्रवेश प्रक्रियेत अर्ज भरण्यासाठी आणखी मुदतवाढ द्यावी, अशी मागणी विद्यार्थी-पालकांकडून होत होती. त्याला सकारात्मक प्रतिसाद देत सीईटी सेलने अर्ज सादर करण्याच्या प्रक्रियेला मुदतवाढ दिली आहे.

राज्यातील सर्व शासकीय, अनुदानित, विद्यापीठाचे व्यवस्थापन असणाऱ्या संस्था आणि विभाग, विनाअनुदानित खासगी व्यावसायिक शिक्षण संस्थांमध्ये शैक्षणिक वर्ष २०२३-२४ मध्ये बी.ई आणि बी.टेक प्रथम वर्ष अभ्यासक्रमाच्या प्रवेशासाठी ही प्रवेश प्रक्रिया केंद्रीय पद्धतीने राबविण्यात येत आहे.

या प्रवेश प्रक्रियेत विद्यार्थ्यांना ऑनलाइन नोंदणी, प्रवेशासाठी आवश्यक कागदपत्रे अपलोड करण्यासाठी बुधवारपर्यंत मुदत आहे. तर कागदपत्रांच्या पडताळणी, अर्ज निश्चिती करणे याकरिता शनिवारपर्यंत (ता. ८) मुदत दिली आहे. तर अभ्यासक्रमाच्या प्रवेशाचे पुढील वेळापत्रक लवकरच जाहीर करण्यात येईल, असे सीईटी सेलने यापूर्वीच जाहीर केले आहे.

अधिक माहितीसाठी संकेतस्थळ : www.mahacet.org

बी.ई/बी.टेक प्रवेश प्रक्रियेचे वेळापत्रक -

तपशील : कालावधी

- ऑनलाइन नोंदणी, अर्ज सादर करणे, प्रवेशासाठी आवश्यक कागदपत्रे अपलोड करणे - ७ जुलैपर्यंत

- कागदपत्रांची पडताळणी, पडताळणीची पद्धत निवडणे, अर्ज निश्चिती करणे : ८ जुलैपर्यंत