आंबेगाव : तालुक्याच्या आदिवासी भागातील आहूपे ,भीमाशंकर व पाटण खोऱ्यात मुसळधार पावसामुळे घोड नदी व बुब्रा नदीला पूर आला आहे. या पुरात माळीन फाट्यावर आंबडे येथील नागरीक चंद्रकांत काळू असवले ( वय 48 वर्ष) हे पुरात वाहून गेले आहेत. त्यांचा दुपारपर्यंत शोध लागला नाही. डिंभे धरणातून पाचही दरवाजातून 22000 क्युसेस ने घोड नदी पात्रात दुपारी एक वाजल्या पासून पाणी सोडण्यात येत आहे.

गेली दोन दिवस मुसळधार पावसामुळे आदिवासी भागातील जनजीवन विस्कळीत झाले आहे. ओढे नाल्यांना पूर आले आहेत .भात खाचरे तुडुंब भरून वाहत आहेत. अनेक ठिकाणी शेतीचे बांध वाहून गेले आहेत. घोड नदी व बुब्रा नदीला पूर आल्यामुळे त्या दुथडी भरून वाहत आहेत. सध्या धरणात 22 हजार क्युसेसनी पाण्याची आवक सुरू असून धरणातून तेवढेच पाणी घोड नदीपात्रात सोडले जात आहे. सहायक पोलीस निरीक्षक जीवन माने यांनी सकाळपासूनच गावागावात जनजागृती करण्यासाठी पोलीस पाटील व नागरिकांची मदत घेतली आहे.

सार्वजनिक बांधकाम विभाग व तहसील कार्यालय सर्व परिस्थितीवर लक्ष ठेवून आहेत. नागरिकांनी नदी काठावर जाऊ नये. असे आवाहन तहसीलदार रमा जोशी व गटविकास अधिकारी जालिंदर पठारे यांनी केले आहे .धरणात पाण्याची आवक वाढली तर नदीपात्रात जास्त पाणी सोडले जाईल. नागरिकांनी काळजी घ्यावी. असे आवाहन डिंभे प्रकल्पाचे उपअभियंता तानाजी चिखले यांनी केले आहे.

डिंभे धरण शंभर टक्के भरले असून धरण साठ्यात 12.50 टीएमसी पाणीसाठा आहे. आज सकाळी आठ वाजेपर्यंत धरण परिसरात 18 मिलिमीटर पाऊस पडल्याची नोंद झाली आहे .तर आज पर्यंत एकूण १२68 मिलिमीटर पाऊस पडल्याची नोंद झाली आहे. गेल्या वर्षीपेक्षा जवळजवळ ३५० मिलिमीटर पाऊस जास्त झाल्याची आकडेवारीवरून दिसते.