पुणे, ता. २३ ः पीक कर्ज मंजुरीसाठी लाच स्वीकारताना अटक करण्यात आलेला पुणे जिल्हा मध्यवर्ती सहकारी बॅंकेचा विकास अधिकारी दीपक सायकर याला जिल्हा बॅंकेचे मुख्य कार्यकारी अधिकारी प्रतापसिंह चव्हाण यांनी गुरुवारी (ता.२३) बँकेच्या सेवेतून निलंबित केले. सायकर याची खातेनिहाय चौकशी करण्याचा आदेशही चव्हाण यांनी दिला आहे.

जिल्हा बॅंकेच्या वाघोली शाखेत बुधवारी (ता.२२) हा प्रकार उघडकीस आला होता. जिल्हा बॅंकेमार्फत जिल्ह्यातील विविध कार्यकारी सहकारी सोसायटी संस्थांना विविध प्रकारचा शेतीविषयक बाबींचा कर्ज पुरवठा केला जातो. संस्थेच्या सभासदांशी जिल्हा बॅंकेच्या अधिकाऱ्यांचा प्रत्यक्ष सबंध येत नाही. त्यामुळे जिल्हा बॅंकेच्या अधिकाऱ्याने व्यक्तिगतरीत्या मागितलेल्या लाचेशी बॅंकेचा संबंध येत नाही. त्यामुळे लाचलुचपत विभागाच्या अधिकाऱ्यांनी केलेल्या कारवाईशी जिल्हा बॅंकेच्या कर्जवाटपाचा काहीही संबंध नसल्याचे बॅंकेचे मुख्य कार्यकारी अधिकारी प्रतापसिंह चव्हाण यांनी प्रसिद्धीपत्रकाद्वारे कळविले आहे.