पुणे - महापालिकेत (Pune Municipal) नव्याने समाविष्ट झालेल्या अकरा गावांमध्ये (Village) सांडपाणी (Drainage Water) वहन व्यवस्था, सांडपाणी शुद्धीकरण केंद्र उभारण्यासाठी तब्बल ३९२ कोटी रुपयांचा प्रकल्प (Project) केला जाणार आहे. यासाठी येणाऱ्या खर्चाची तरतूद पुढील तीन वर्षासाठी अंदाजपत्रकामध्ये (Budget) करावी असा प्रस्ताव आज स्थायी समितीने (Standing Committee) मान्य केला, अशी माहिती अध्यक्ष हेमंत रासने यांनी आज पत्रकार परिषदेत दिली.

'समाविष्ट ११ गावांमध्ये सांडपाणी शुद्धीकरणाच्या प्रकल्प अहवाल केला आहे. यामध्ये १११ किलोमीटरच्या सांडपाणी वाहिन्या आणि ५७ किलोमीटरच्या मुख्य सांडपाणी वाहिन्या टाकण्यात येणार आहेत. तसेच अस्तित्वातील १४ किलोमीटरच्या वाहिन्यांमध्ये सुधारणा केली जाणार आहे. त्यासाठी अनुक्रमे १०० कोटी ६३ लाख रुपये, १०१ कोटी ८ लाख रुपये आणि १३ कोटी ३७ लाख रुपयांची अंदाजपत्रकीय तरतूद करण्यात आलेली आहे. मांजरी बुद्रूक येथे ९३.५० एमएलडी आणि केशवनगर येथे १२ एमएलडी मैलापाण्यावर प्रक्रिया करण्यात येणार आहे. त्यासाठी १७७ कोटी ८८ लाख रुपयांची तरतूद करण्यात आलेली आहे. अशाप्रकारे ३९२ कोटी ९६ लाख रुपयांची एकूण तरतूद करण्यात आलेली आहे. मात्र, निविदा प्रक्रिया राबविताना यामध्ये नियम व अटी बदलून ठराविक ठेकेदारास काम मिळावे यासाठी उद्योग केला गेला होता. हे प्रकरण ‘सकाळ’ने समोर आणले होते. त्यानंतर आता या प्रकल्पांच्या निविदेची तपासणी करण्यासाठी तांत्रिक समिती नेमली असून, कागदपत्रांची छाननी सुरू आहे.

रासने पुढे म्हणाले, ‘२०४७ पर्यंतचा विचार करून हा प्रकल्प राबविला जात आहे, निविदांमध्ये पुरेशी स्पर्धा व्हावी या उद्देशाने वेळोवेळी मुदतवाढ देण्यात आली होती. या निविदेत चार कंपन्यांनी प्रतिसाद दिला होता. तज्ज्ञ सल्लागार प्रायमूव्ह इनफ्रास्ट्रक्चर डेव्हलपमेंट यांच्यामार्फत कागदपत्र आणि निकष पूर्ततेची छाननी करण्यात आली. निविदा मूल्यमापन समितीसमोर सादरीकरण करण्यात आले होते.हे काम पुढील तीन आर्थिक वर्षांत तीन टप्प्यात पूर्ण करण्यात येणार आहे.