पुणे : पुणे शहरात भर रस्त्यात दोन बैलांची झुंड लागल्याची घटना घडली आहे. त्यामुळे नागरिकांमध्ये चांगलीच घाबरगुंडी उडाली असून अनेक दुकानदारांनी आपली दुकाने बंद केली. पुणे शहरातील वडगाव शेरी येथे ही घडना घडली असून याप्रकरणाचा व्हिडिओ सोशल मीडियावर व्हायरल झाला आहे.

दरम्यान, बैलांचा हा धुमाकूळ बराच वेळ सुरू होता. त्यामुळे तर अनेक वाहन चालक वाहन सोडून पळाले असून अनेक दुकानदारांनी आपली दुकाने बंद केल्याचे प्रकार घडले. रस्त्यावर उभ्या असलेल्या दुचाकींना धक्का लागून दुचाकी रस्त्यावर पडल्यामुळे काही दुचाकींचे किरकोळ नुकसानही झाल्याची माहिती समोर आली आहे.

पुणे शहरातील मोकाट जणावरांच्या त्रासामुळे काही नागरिकांनी पुणे महापालिकेकडे तक्रार केल्याचे प्रकार याआधी झाले होते. त्यानंतर महापालिकेकडून यावर कारवाई केली होती. बैलाच्या झुंडीच्या या प्रकरणानंतरही नागरिकांकडून या प्राण्यांचा बंदोबस्त करण्याची मागणी होत आहे.