वरवंड : दौंड तालुक्यातील वरवंड येथे कासवाची शिकार करून खाण्याच्या उद्देशाने त्याला चुलीवर जिवंत भाजून जीवे मारून कापून टाकल्याचा धक्कादायक प्रकार घडला.याप्रकरणी बापलेकावर वनगुन्हा दाखल करून त्यांना शिताफीने अटक करण्यात आली. नाना धर्माजी सावंत व दादा नाना सावंत ( रा.वरवंड तालुका दौंड जिल्हा पुणे) अशी या आरोपींची नावे आहेत.

याबाबत दौंड वनपरिक्षेत्र अधिकारी कल्याणी गोडसे यांनी माहिती दिली. तालुक्यातील वरवंड येथे भरलोकवस्तीत एकाठिकाणी कासव पकडून चुलीवर जिवंत जाळत असल्याची गोपनीय माहीती वनविभागाला मिळाली.वनपरिमंडल शीतल खेंडके व वनरक्षक शीतल मेरगळ यांनी या घटनेची तत्काळ दखल घेतली. वनाधिकारी शीतल खेंडके व वनरक्षक मेरगळ यांनी वनकर्मचार्यना घेऊन घटनास्थळी धाड मारली.

त्यावेळी आरोपी सावंत यांनी कासवाचे तुकडे करून शिजविण्याच्या उद्देशाने एका भांड्यात ठेवल्याचे आढळून आले.वनाधिकारी यांनी ते तात्काळ ताब्यात घेतले.कारवाईची माहिती मिळताच संबधीत ठिकाणी मोठा जमाव जमला. यावेळी दौंड परिक्षेत्रातील अतिरिक्त वनबंदोबस्त पाचारण करण्यात आला.

दोन्ही आरोपींना मोठ्या शिताफीने ताब्यात घेण्यात आले.रात्री उशिरा दोघांवर भारतीय वन्यजीव अधिनियम कायद्याअंतर्गत गुन्हा दाखल करण्यात आला आहे. पुणे विभागाचे उपवनसंरक्षक राहुल पाटील,सहायक उपवनसंरक्षक दीपक पवार यांच्या मार्गदर्शनाखाली दौंड वनपरिक्षेत्र अधिकारी कल्याणी गोडसे तपास करीत आहे.