Pune Crime News: पाण्याच्या टाकीत पैसे टाका 20 पट करून देतो असे सांगत पुण्यातील महिलेला 20 लाख रुपयांना गंडा घालण्यात आला. रूममध्ये धूर करून पूजा करतो तसच 20 लाखांचे 12 दिवसात 5 कोटी होतील या अमिषाला महिला बळी पडली.

पुण्यातील मध्यवर्ती असलेल्या नारायण पेठेतील ही घटना आहे. याप्रकरणी 41 वर्षीय महिलेने पुण्यातील विश्रामबाग पोलीस ठाण्यात तक्रार दाखल केली आहे.

तक्रारीवरून तनवीर पाटील, शिवम गुरुजी, सुनील राठोड, आनंद स्वामी अशा 4 जणांवर विश्रामबाग पोलिस ठाण्यात कलम 420 अंतर्गत गुन्हा दाखल करण्यात आला आहे.

तक्रारदार महिला रिअल इस्टेटचे काम करतात. तक्रारदार महिलेच्या व्यवसायामध्ये आणखी एक भागीदार आहेत. या दोघांची एका व्यवहारात तनवीर पाटील नावाच्या व्यक्तीशी भेट झाली होती. तनवीर पाटीलने फिर्यादी महिलेला एका गुरुजीच्यामाध्यमातून पैसे 20 पट करण्याची कल्पना सांगितली.

तनवीर पाटील याने तक्रारदार महिलेची एका भोंदूबाबाशी भेट घडवून आणली. यावेळी भोंदूबाबांचे नाव आनंदस्वामी असे सांगण्यात आले. यावेळी 20 लाखांचे पाच कोटी करतो असे भोंदूबाबांने सांगितले. यावर महिलेने विश्वास ठेवत पैशांची सोय करण्याचे सांगितले. तक्रारदार महिलेने ओळखीच्या व्यक्तीकडून 20 लाख रुपये घेतले.

13 सप्टेंबरला रात्री तनवीर पाटील आणि दोन जण महिलेच्या घरी गेले. त्या दोघांचे नाव शिवम गुरुजी आणि सुनिल राठोड असे सांगण्यात आले.

शिवम गुरुजी याने 200 लिटरच्या बॅरेलमध्ये वीस लाख रुपये टाकण्यास सांगितले आणि त्यानंतर त्या रूमची लाईट बंद करून त्या ठिकाणी आरोपींनी धूर केला. तक्रारदार महिलेला रूमच्या बाहेर काढले.

त्यानंतर 10 मिनिटानंतर तनवीर पाटील, शिवम गुरुजी, सुनिल राठोड यांनी तक्रारदार महिला आणि त्यांच्या दोन सहकाऱ्यांना सांगितले की हरिव्दार येथे जाऊन पूजा करतो. पूजा केल्यानंतर 20 लाखाचे 5 कोटी होती. यासाठी 12 दिवसांचा कालावधी लागेल.

25 सप्टेंबरला 12 दिवस पूर्ण झाल्यानंतर महिलेने तनवीर पाटील यांना फोन केला. मात्र त्याने उडवाउडवीची उत्तरे दिली. महिलेला संशय आला त्यांनी पाण्याची टाकी उघडून बघितली तर त्यात पैसे नव्हते. आपली फसवणूक झाल्याचे लक्षात येताच तक्रारदार महिलेने पोलीस ठाणे गाठले. याप्रकरणी पोलीस अधिक तपास करत आहेत.  (Latest Crime News)