पुणे, ता. १५ ः गणेशोत्सवाच्या पार्श्वभूमीवर बेकायदा पथारी व्यावसायिकांविरोधात कारवाई करणाऱ्या महापालिकेच्या अतिक्रमण विभागाच्या कर्मचाऱ्यांना धक्काबुक्की केल्याची घटना मंडई परिसरात घडली. या प्रकरणी एका महिलेसह तिघांवर फरासखाना पोलिस ठाण्यात गुन्हा दाखल करण्यात आला आहे.
विनोद जक्शी वाघिरे (वय ३०), निशा घनश्याम वाघिरे (वय २५) आणि रामजी घनश्याम वाघिरे (वय २२, तिघेही रा. महात्मा गांधी वसाहत, पाटील इस्टेट, जुना मुंबई-पुणे रस्ता) अशी गुन्हा दाखल झालेल्यांची नावे आहेत. याबाबत अतिक्रमण विभागाचे कर्मचारी नीलेश चव्हाण (वय ४३, रा. मंगळवार पेठ) यांनी फिर्याद दिली आहे.
पोलिसांनी दिलेल्या माहितीनुसार, गणेशोत्सवाच्या पार्श्वभूमीवर मध्यवर्ती भागातील बेकायदा पथारी व्यावसायिकांविरोधात महापालिकेच्या अतिक्रमण विभागाकडून कारवाई सुरू आहे. रविवारी (ता. १३) रात्री साडेआठच्या सुमारास महात्मा फुले मंडई परिसरातील गोटीराम भय्या चौकात पथारी व्यावसायिकांवर कारवाई करण्यात आली. त्या वेळी वाघिरे यांनी कारवाईला विरोध केला. कारवाईदरम्यान जप्त केलेला माल पालिकेच्या वाहनात ठेवला होता. आरोपींनी वाहनातील जप्त माल रस्त्यावर फेकून दिला. तसेच अतिक्रमण विभागाच्या कर्मचाऱ्यांना शिवीगाळ करून धक्काबुक्की केली. यावेळी अजय भिसे यांना लाथ मारून शिवीगाळ केल्याचे फिर्यादीत नमूद केले आहे.