सुपे : सुपे परिसरात रात्री झालेल्या पावसाने हाहाःकार माजवला. जमीनी वाहिल्या, शेतीमाल व घरांची पडझड. बंधारे, तलाव तुडूंब. ओढ्यांना पूर आल्याने घनेक ठिकाणी घरांमध्ये पाणी शिरले आहे. अनेक गावांचे रस्ते बंद झाल्याने दळण-वळण बंद झाले आहे. दरम्यान, आज सकाळी महसूल विभागाने ठिकठिकाणी पाहणी करून नुकसानीचे पंचनामे सुरू केल्याची माहिती सुप्याचे मंडलाधिकारी लक्ष्मीकांत मुळे, तलाठी नितीन यादव यांनी दिली.

सुप्यात रात्री ९० मिमि पाऊसाची नोंद झाली असून, आतापर्यंत एकूण ६५६ मिमी पाऊस झाला आहे. या परिसरासाठी हा मोठा पाऊस आहे. बोरकरवाडीचे माजी उपसरपंच दत्तात्रेय कदम म्हणाले - या परिसरात सोमवारी सायंकाळी ६ ते रात्री उशिरापर्यंत ढगफुटी सदृष्य पाऊस झाल्याने सुमारे २० घरांमध्ये पाणी शिरले आहे.

तलाव भरून वाहत असल्याने कालची रात्र ग्रामस्थांनी भितीपोटी जागून काढली. येथील श्रीविठ्ठल मंदीराला पाणी लागले होते. जमिनी वाहिल्या, पीके गेली, अनेक घरांना पाण्याचा वेढा पडला. ओढ्यांना पाणी असल्याने जनसंपर्क तुटला आहे. पुरंदरच्या गावात पाऊस वाढला तर तलावाला धोका होण्याची भिती कदम यांनी व्यक्त केली.

काऱ्हाटीचे सरपंच बी.के.जाधव म्हणाले - काऱ्हाटीतून बाहेर जाण्यासाठी सुपे,बाबुर्डी व जळगावकडून संपर्क तुटला आहे. अनेक ओढ्यांवरील पुलांची उंची वाढवण्याची मागणी आहे. कऱ्हानदीवर मोठा उंच पुल होण्याची गरज त्यांनी व्यक्त केली. भोंडवेवाडी ते सुपे संपर्क तुटला होता. सकाळी पाणी ओसरल्यावर वाहतूक सुरळीत झाली. येथील काही घरांना पाण्याचा वेढा पडला होता. येथील पुलाची उंची वाढवण्याची सरपंच कांतीलाल मेरगळ यांची मागणी आहे.

चांदगुडेवाडीच्या खंडूखैरेवाडीत पाच घरांमध्ये पाणी शिरले आहे तर आठ घरांची पडझड झाल्याची माहिती सरपंच मंगल पारसे यांनी दिली. वढाण्यात पुरामुळे ओढ्यावरील एक पुल वाहून गेल्याची माहिती सरपंच सुनिल चौधरी यांनी दिली.

दिवाळीच्या खरेदीवर परिणामः

कोरोना महामारीनंतर सुप्याची बाजार पेठ दिवाळीसाठी नुकतीच सजली आहे. येथील कापड, फर्निचर, भांडी, किराणा, सराफ व्यवसायीक तयार झाले आहेत. परंतू, पावसामुळे बाजार पेठेत खरेदीला उत्साह नाही. तसेच, शेतातील भाजीपाल्याचे नुकसान झाल्याने येथील शेतीमाल बाजार पेठेवरही त्याचा परिणाम झाला आहे.