उरुळी कांचन : गुटख्याचा साठा करून विक्री करणाऱ्यास कथित पत्रकार असल्याचे भासवून अडीच लाख रुपयांची खंडणी घेणाऱ्या टोळीला लोणी काळभोर पोलिसांनी बेड्या ठोकल्या. खंडणीची रक्कम, गुटखा व वाहन असे एकूण साडे अकरा लाख रुपयांचा ऐवज जप्त करण्यात आला. लोणी काळभोर पोलिसांनी उरुळी देवाची येथील बाजारेमळा येथे ही कारवाई केली.

प्रवीण बाजीराव झेंडे (वय 27, रा.जिजामाता चौक, आंबेगाव पठार), विनोद अंबादास साळुंके (वय 45, रा.कात्रज), प्रमोद भानुदास घोणे (वय 26, रा. धनकवडी), सोमनाथ यशवंत भडावळे (वय 33, रा.धनकवडी), बबन अंबादास साळुंके (वय 44), परमेश्‍वर अभिमान यमगर (वय 35, , रा.फालेनगर, कात्रज) यांना अटक करण्यात आली. तसेच त्यांना रक्कम देणाऱ्या अबु सहामा शेख (वय 36, रा. मार्केट यार्ड) याच्याविरुद्ध गुन्हा दाखल करून त्याच्या गोडाऊनमधील गुटखा जप्त करण्यात आला.

उरुळी देवाची येथील बाजारमेळा येथील अबु शेख याने अवैध गुटखा साठा केला असून त्याच्याकडे कथित पत्रकार प्रवीण झेंडे याने 5 लाख रुपयांची खंडणी मागितली. खंडणी घेण्यासाठी ते बाजारेमळा येथे येणार असल्याची माहिती लोणी काळभोर पोलिस ठाण्याचे वरिष्ठ पोलिस निरीक्षक राजेंद्र मोकाशी यांना मिळाली. त्यानुसार, त्यांच्या पथकाने सापळा रचून आरोपींना अटक केली. पोलिसांनी त्यांच्याकडून अडीच लाख रुपयांची रक्कम जप्त केली.