पुणे : पुणे आणि पिंपरी चिंचवडमधील जम्बो कोविड रुग्णालयांच्या उभारणीसाठी पुण्याचे विभागीय आयुक्त सौरभ राव यांच्या अध्यक्षतेखाली भारतीय प्रशासकीय सेवेतील सहा अधिकाऱ्यांची सुकाणू समिती स्थापन करण्यात आली. या समितीला पारदर्शक काम करण्याच्या सूचना दिल्या होत्या. त्यानुसार या समितीने पारदर्शक काम केले आहे. त्यामुळे या रुग्णालयांच्या उभारणीत राजकारण्यांचा संबंध येतोच कुठे, असा सवाल पालकमंत्री अजित पवार यांनी शनिवारी (ता. १२) पुण्यात पत्रकारांशी बोलताना केला.

भाजपचे नेते किरिट सोमय्या यांनी पुणे आणि पिंपरी चिंचवडमधील जम्बो कोविड रुग्णालयांच्या उभारणीत भ्रष्टाचार झाल्याचा आरोप केला आहे. या पार्श्‍वभूमीवर पवार यांना प्रश्‍न विचारण्यात आला होता. त्या प्रश्‍नाला उत्तर देताना त्यांनी हा सवाल केला आहे. पवार म्हणाले, ‘‘विभागीय आयुक्तांच्या अध्यक्षतेखालील या समितीत पुणे महानगरपालिकेचे आयुक्त विक्रम कुमार, पिंपरी पालिकेचे आयुक्त राजेश पाटील, पुणे महानगर क्षेत्र विकास प्राधिकरणाचे आयुक्त सुहास दिवसे, जिल्हाधिकारी डॉ. राजेश देशमुख आणि जिल्हा परिषदेचे मुख्य कार्यकारी अधिकारी आयुष प्रसाद यांचा समावेश होता. या समितीने या दोन्ही रुग्णालयांच्या उभारणीची कार्यवाही नियमानुसारच केली असल्याचे मला कोरोना आढावा बैठकीत सांगण्यात आले आहे.’’

पुणे शहर व जिल्ह्यातील आठवड्याची कोरोना आढावा बैठक पवार यांनी शनिवारी (ता.१२) घेतली. या बैठकीनंतर पवार पत्रकारांशी बोलत होते. त्यावेळी त्यांनी ही माहिती दिली. दरम्यान, शनिवारच्या कोरोना आढावा बैठकीत पहिल्यांदा जम्बो कोविड रुग्णालये उभारणी याच विषयावर चर्चा झाली. त्यावेळी विभागीय आयुक्त राव यांनी बैठकीत ही माहिती दिल्याचे पवार यांनी स्पष्ट केले.

पवार म्हणाले, ‘‘पुणे व पिंपरी चिंचवड शहरात कोरोनाच्या संसर्गात वाढ झाल्याने, रुग्णसंख्या वाढली होती. कोरोनाच्या सर्व रुग्णांना कोरोनावरील मोफत उपचार उपलब्ध करून देण्याच्या उद्देशाने पुण्यातील शिवाजीनगर येथील अभियांत्रिकी महाविद्यालयाच्या प्रांगणावर आणि पिंपरी चिंचवडमधील अण्णासाहेब मगर स्टेडियमच्या मैदानावर प्रत्येकी एक जम्बो कोविड रुग्णालयाची उभारणी करण्यात आली. यासाठीची जबाबदारी महानगर क्षेत्र विकास प्राधिकरणाचे आयुक्त सुहास दिवसे यांच्याकडे देण्यात आली.

ही दोन्ही रुग्णालये तत्काळ सुरु करण्यासाठी राज्य सरकारने संबंधित सर्व स्थानिक स्वराज्य संस्थांच्या वरिष्ठ अधिकाऱ्यांचा समावेश असलेल्या तीन समित्या स्थापन करण्यात आल्या आणि तीन समित्यांच्या निर्णयांची अंमलबजावणी करणारी संस्था ही पुणे महानगर क्षेत्र विकास प्राधिकरण असेल, असे निश्‍चित केले. या सर्व समित्यांनी नियमानुसार लघु निविदा काढून ही रुग्णालये उभारली आहेत.’’

‘कोव्हॅक्सिन लसीसाठी पाठपुरावा करू’

शहर व जिल्ह्यातील १५ ते १८ वयोगटातील मुलांच्या लसीकरणात पुणे शहर व पिंपरी चिंचवड मागे पडले आहे. मुलांसाठी देण्यात येत असलेल्या कोव्हॅक्सिन लसीचा साठा उपलब्ध होत नाही. त्यामुळे मुलांच्या लसीकरणासाठी शाळा, महाविद्यालयांमध्ये लसीकरण शिबिरांचे आयोजन करण्यात अडचणी येत आहेत. या अडचणी दूर करण्यासाठी या लसीच्या उपलब्धतेसाठी वरिष्ठ पातळीवर पाठपुरावा केला जाईल. असेही पालकमंत्री अजित पवार यांनी सांगितले.