पुणे : खडकवासला धरण साखळीतील पाणलोट क्षेत्रात रात्रभर पावसाने दमदार हजेरी लावली. त्यामुळे शुक्रवारी चार धरणांमधील पाणीसाठ्यात रात्रीतून सुमारे एक अब्ज घनफूट (टीएमसी) ने वाढ झाली. टेमघर, वरसगाव, पानशेत आणि खडकवासला या चार धरणांतील पाणीसाठा 21.08 टीएमसी (72.30 टक्के) इतका झाला आहे. खडकवासला आणि वीर धरणातून नदीत पाण्याचा विसर्ग सुरू आहे. त्यामुळे नदीपात्रात कोणी जाऊ नये. तसेच वाहने पार्किंग करू नयेत, असा सतर्कतेचा इशारा जलसंपदा विभाग आणि जिल्हा आपत्ती व्यवस्थापनाकडून देण्यात आला आहे.

ताज्या बातम्यांसाठी डाऊनलोड करा ई-सकाळचे ऍप

खडकवासला धरणातून गुरुवारी सायंकाळी मुठा नदीतून 11 हजार 705 क्युसेकने विसर्ग वाढविण्यात आला होता. तो आज सकाळी पाच हजार 136 क्युसेक करण्यात आला आहे. वीर धरणातून 32 हजार 214 क्युसेकने नीरा नदीत विसर्ग करण्यात येत होता. तो सकाळी कमी करून 23 हजार 127 क्युसेक करण्यात आला आहे. टेमघर धरणाच्या पाणलोट क्षेत्रात काल रात्री आठ ते आज शुक्रवारी सकाळी आठ वाजेपर्यंत 110 मिलिमीटर, वरसगाव 134, पानशेत धरणाच्या क्षेत्रात 142 मिलिमीटर आणि खडकवासला धरण क्षेत्रात सकाळपर्यंत 42 मिलिमीटर पावसाची नोंद झाली. खडकवासला प्रकल्पात गतवर्षी 14 ऑगस्टअखेर 29.15 टीएमसी (100 टक्के) पाणीसाठा होता.

पुण्याच्या बातम्या वाचण्यासाठी येथे ► क्लिक करा
  
खडकवासला प्रकल्पातील पाणीसाठा (टीएमसीमध्ये) कंसात टक्केवारी :
टेमघर 1.94    (52.19)
वरसगाव 8.57   (66.80)
पानशेत 8.61  (80.80)
खडकवासला 1.97  (100)