पुणे, ता. २७ : बंडगार्डन रस्त्यावरील एका पंचतारांकित हॉटेलमध्ये हायप्रोफाइल वेश्याव्यवसाय सुरू असल्याचे समोर आले आहे. गुन्हे शाखेच्या अनैतिक मानवी वाहतूक प्रतिबंधक कक्षाने (एएचटीयू) हॉटेलमध्ये छापा टाकून परराज्यांतील मॉडेलिंग क्षेत्रातील दोन तरुणींची सुटका केली.
रोहन ऊर्फ राजकुमार (वय ३२), विवेक ऊर्फ मयंक कबीर (वय ३४), विक्रम ऊर्फ पीयूष (वय ३४, तिघेही रा. आसाम) आणि त्यांचा एक साथीदार अशा चौघांवर कोरेगाव पार्क पोलिस ठाण्यात गुन्हा दाखल झाला.
पोलिसांनी दिलेल्या माहितीनुसार, संगमवाडी-बंडगार्डन रस्त्यावरील एक्साइज कॉलनीजवळील एका पंचतारांकित हॉटेलमध्ये एजंटांमार्फत परराज्यांतील तरुणींना आणून वेश्याव्यवसाय चालविला जात असल्याची माहिती पोलिसांना मिळाली. ‘एएचटीयू’ कक्षाच्या पोलिस निरीक्षक आशालता खापरे यांच्या पथकाने बनावट ग्राहक पाठवून खातरजमा केली. त्यानंतर पथकाने सोमवारी (ता. २६) हॉटेलमध्ये अचानक छापा टाकला. या वेळी मॉडेलिंग क्षेत्रात काम करणाऱ्या परराज्यांतील दोन तरुणी आढळल्या. या तरुणींना ताब्यात घेऊन त्यांची सुटका करण्यात आली. आरोपी एजंट या तरुणींना पैशांचे आमिष दाखवून त्यांच्याकडून देहव्यापार करवून घेत असल्याचे तपासात समोर आले आहे. गुन्हे शाखेच्या अतिरिक्त पोलिस आयुक्त तेजस्वी सातपुते, उपायुक्त गौहर हसन, सहाय्यक आयुक्त शंकर खटके यांच्या सूचनेनुसार ‘एएचटीयू’ पथकाने कारवाई केली.