पुणे - प्रेमविवाहानंतरही पतीने संशय घेत मोबाईल क्रमांक ब्लॉक केल्यामुळे एका विवाहितेने गळफास घेऊन आत्महत्या केली. याप्रकरणी भारती विद्यापीठ पोलिस ठाण्यात गुन्हा दाखल करण्यात आला आहे.

समीक्षा माने (वय २२) असे या विवाहित महिलेचे नाव आहे. ही घटना कात्रज येथील संतोषनगरमधील घुंगरुवाले चाळीत ८ जानेवारी रोजी सकाळी नऊ वाजता घडली. या संदर्भात वडील राहुल देवराव माने (वय ४८, रा. आंबेडकरनगर, यवतमाळ) यांनी फिर्याद दिली आहे. त्यावरुन पोलिसांनी अविनाश कुरेवार (रा. पांढरकवडा, जि. यवतमाळ) याच्याविरुद्ध गुन्हा दाखल केला आहे.

पोलिसांनी दिलेल्या माहितीनुसार, अविनाश आणि समीक्षा हे दोघे मूळचे यवतमाळ येथील आहेत. त्यांचे एकमेकांवर प्रेम असल्यामुळे त्यांनी घरी न सांगता प्रेमविवाह केला. ती शिक्षणासाठी पुण्यात राहत होती. परंतु समीक्षा ही दुसऱ्या मुलासोबत बोलत असल्याचा संशय घेऊन तो तिला मारहाण करीत होता. तिला सतत त्रास देऊन त्याने तिचा मोबाईल क्रमांक ब्लॉक केला. त्यामुळे या विवाहितेने घरी पंख्याला ओढणीने गळफास घेऊन आत्महत्या केली.