उंड्री - उंड्री (ता. हवेली) येथील स. नं. ५१ आणि ५९ मधील अनधिकृत चार-पाच मजली दोन इमारतीवर कारवाई केली. सुमारे ३० हजार चौरस फूट क्षेत्र मोकळे केल्याची माहिती महापालिकेचे कनिष्ठ अभियंता अनुप गज्जलवार यांनी दिली.

गज्जलवार म्हणाले की, स. नं. ५१ आणि ५९ येथे बांधकाम विकास विभाग झोन-१च्या वतीने अनधिकृत बांधकामांवर कारवाई करण्यात आली. कार्यकारी अभियंता प्रवीण शेंडे यांच्या मार्गदर्शनाखाली उपअभियंता संदीप शिंदे, शाखा अभियंता शैलेंद्र काठवटे, गोपाळ भंडारी, कनिष्ठ अभियंता अनुप गज्जलवार आणि पोलीस निरीक्षक राजू अडगाळे यांच्या पथकाने ही कारवाई केली.

कारवाईसाठी दहा बिगारी, एक जेसीबी, दोन ब्रेकर आणि एक जॉ कटरच्या साहाय्याने कारवाई करून दोन्ही इमारती पाडल्या. कारवाई दरम्यान कोणत्याही अनुचित प्रकार घडू नये, यासाठी कोंढवा पोलिसांनी कडक बंदोबस्त ठेवला होता, असे त्यांनी सांगितले.